Elias Querejeta zinemagile hernaniarrak zinearen historian egindako lanagatik Zinemira Saria jaso zuen asteazkenean, Donostiako Zinemaldiko Euskal Zinemaren Galan. Querejetak, Hernaniri eskaini zion saria: «Haurtzaroa aberria da, aberri bakarra. Eta nere haurtzaroa Hernani da. Beraz, nere aberria Hernani da eta Hernaniri eskaintzen diot sari hau». Horrez gain, bere txikitako laguna eta oraindik ere badena izan zuen gogoan: Eusebio Muñoa Recondo hernaniarra. Querejetak 59 pelikula egin ditu, 21 sari jaso ditu (asteazkenekoarekin 22), eta 19 aldiz omendu dute.