Euskera maila bajuko jende dexente apuntatzen ari da, iaz bezala

Irailarekin batera, euskaltegietako matrikulazio kan­paina martxan jarri zen eta oraindik bada izena emateko aukera. Matrikulazio kanpainari buruzko nondik-norakoak jakiteko asmoz, Udal Eus­kaltegiko eta AEKko ordezkariekin hitz egin du Hernaniko Kro­ni­kak. Azaldu dutenez, oraindik zaila da jakitea aurten izango den ikasle kopurua, baina iazkoari eutsiko diotela uste dute. Iaz Udal Euskal­tegian 143 aritu ziren euskera ikasten eta AEKn 140 inguru. Orain arte, 100na lagun inguruk eman dute izena euskaltegi bakoitzean. Ikasle motari dagokionean, iaz bezala, euskera maila bajuko jende dexente apuntatzen ari dela azaldu dute. «Beste urtetako jende asko dago izena emanda, baina jende berria ere apuntatu da. Gainera, iaz eta aurten joera nabaritu dugu hasierako mailetako jende as­kok eman duela izena. Poz­tekoa da, horrek jarraipena izan dezakeelako», dio Guru­tze Sa­laberriak Udal Euskalte­giko zuzendariak. Dena dela, orain arte bezala, maila altuko jendea ibiltzen da batez ere euskaltegian, azterketetarako prestatu nahi duena. AEKn ere nabaritu dute beheko mailetan mugimendu gehiago, etorkinak tarteko. Hori horrela, kopuruan alderik ez badago ere, talde gehiago izango dituztela aurreratu dute. Iluntzean, esaterako, bi talde gehiago izango dituzte, 0 mailakoa eta erdi urratsekoa. Udal Euskaltegiaren kasuan bezalaxe, azterketak egiteko jende askok ematen duela izena nabarmendu dute AEKn eta arrazoia langabezia izan daitekeela uste dute, «lanpostuetan perfilak gero eta gehiago eskatzen dituztelako».

Azken urteetan kopurua zertxobait jaitsi
Gurutze Salaberriaren esanetan, orokorrean, azken urteetan jaitsi egin da euskera ikasten duen jende kopurua. Krisiaren eta modulazioen eragina izan daitekeela uste du. «Gure kasuan, HABEre­kin lo­tuta gaude eta 10 orduko mo­dulazioak eskaini behar izaten ditugu eta ordu gutxiago hobe litzateke». Krisiari dagokionean, udalak diru laguntzak ematen dituela gogorarazi du. Bi euskaltegiek herritarrak matrikula egitera eta euskera ikastera animatu nahi izan dituzte eskaintza zabalaren berri emanez.

Udal Euskaltegiko eskaintza
Udal Euskaltegian euskera ikasi edo hobetzeko eskain­tzen dituzten aukeren artean, euskalduntzea da bat. Klaseen ondoren, ikaslea bes­te ordu erdi ere gera liteke bertan, ikaskideekin etxeko lanak egiten, zalan­tzak argi­tzen... eta tutore­tza egiteko aukera ere bada. Guraso eta merkatariena da Udal Eus­kal­tegiak eskain­tzen duen beste aukeretako bat. Autoikaskuntza eta euskerako perfil ezberdinetako azterketak prestatzeko aukera ere ema­ten dute, hala nola, HABEko 1, 2 eta 3garren mailak, IVAP, EGA... Horrez gain, euskera jakin, baina erabilera sustatu edo hobetu nahi dutenentzat jarduera ezberdinak ere antola­tzen dituzte: asteburuko barnetegiak, tailerrak, hitzaldiak... Izen ematea: as­telehenetik ostiralera 09:30­etatik 13:30etara eta 16:30etatik 19:30­etara. In­formazio gehiago: 943 33 18 96 edo euskaltegi@hernani.net.

AEKko eskaintza
Urte osoan asko dira AEK euskaltegiak euskera ikasi edo hobetzeko eskaintzen dituen aukerak: Euskaldun­tze taldeak, azterketak lan­tzeko taldeak, autoikaskun­tzako taldeak eta guneak dira euskaltegiko ardatza. Horrez gain, EGA eta maila guztiak on line egiteko aukera dago; zilegi eskolak ere badaude, hau da, ikasleez gain, herritarrei zuzendutako intereseko gaiei buruzko tailerrak (apikultura, sendabelarrak...), eta mintzalagunak eta bestelako ekintzak ere antola­tzen dituzte. Izen-ematea: 09:00etatik 13:00­e­ta­ra eta 16:00etatik 20:00­etara Her­naniko (Larra­mendi, 11) edo Asti­garragako (kultur etxea) egoi­tzetan; hernani@aek.org edo astigarra­ga@aek.org helbideetan; eta 943557801, 607592864 edo 607610687 telefonoetan.