Mikel Aginagalde
Orain artean izan dituzun arazoak kontuan harturik, zein da zure helburu nagusia Espainiako Txapelketako azken proban?
Aurten zorte txarra izan dut hasieratik arazo mekanikoekin, eta ondorioz ezinezkoa izango zait lehenengo hiruren artean egotea, puntuei dagokienez. Hala ere, txapelketaren azken probako finalean sartu eta sailkapen orokorreko lehenengo zortzien artean egotea da nire xedea.
Espainiako Txapelketa urtean zehar egiten diren sei lasterketek osatzen dute. Saio bakoitzean 60 autok parte hartzen dute guztira. Lau txanda egiten dira eta horietako bakoitzean 15 autok lehiatzen dute. Denbora onena egiten dutenak finalera pasa eta puntuak lortzeko aukera dute. Nire helburua aurreko postuetan egotea izango da.
Ze emaitza izan dituzu lehiatutako azken bost probetan?
Lehen lasterketan bosgarren postuan nihoala autoak huts egin zidan eta hamaikagarren amaitu nuen. Ondorengo bi probetan, berriz, beste lehiakideekin talka egin eta finaletik kanpo geratu nintzen. Nahiko tamalgarria izan zen, baina hurrengo saioan, hau da, laugarrenean, aurretik izandako arazoak gainditu eta helmugara zortzigarren iristea lortu nuen.
Orain arteko azken proba duela hilabete izan nuen Arteixon (Galizia). Han ere autoarekin arazoak izan nituen. Hasi eta berehala gurpila zulatu, denbora asko galdu eta finaletik kanpo geratu nintzen. Hala ere, bigarren aukera izan nuen, eta azkenean lortu nuen onenen artean sailkatu eta hamargarren iristea. Egun hamalaugarrena naiz sailkapen orokorrean.
Non eta zenbat entrenatzen duzu astean zehar?
Egia esan, astegunetan ez dut entrenatzeko astirik izaten lanean aritzen naizelako, baina asteburuetan Miranda de Ebroko edo Gasteizko zirkuituetan ibiltzen naiz. Azken finean, garbi dut autokrosa hobby bat dela, eta gainera, ez didala prestakuntza fisiko handia eskatzen. Horregatik, asteburuetan eta txapelketetan egiten dudanarekin ahal dudan guztia hobetzen saiatzen naiz.
Zeintzuk dira autoaren ezaugarri nagusiak?
Txasi tubularra eta errepideko motoen motorra (600 zk) duen autoa da, eta orokorrean 120-130 km orduko abiadura har dezake. Pisua mugatua da, autoak ezin baitu 315 kilo baino gutxiago pisatu pilotua barruan egon gabe. Pisua faktore garrantzitsua da lehiatzerako orduan.
Inolako diru laguntzarik jasotzen al duzu?
Txapelketetara joateko izaten ditudan gastu guztiak nire patrikatik ordaintzen ditut, ez dut patrozinatzailerik. Hala ere, autoaren fabrikatzaile den Silver Car enpresa nafarrak mekanikarekin zerikusia duten gaietan laguntza ematen dit, adibidez, motorreko piezen prezioak merketuz.
Zer da garrantzitsua pilotu ona izateko?
Nik uste dut burua hotza izatea dela gakoa, lasterketan zehar izaten diren `pike´ horiekin ez berotzea eta zurean bakarrik pentsatzea. Zortearen faktoreak eragin handia du beste hamalau autorekin lehiatzen baituzu eta besteekin talka egin dezakezulako.
Etorkizunera begira ze asmo dituzu?
Rally-a probatuko al zenuke?
Datorren urtean autokrosean jarraitzeko asmoa dut, ea aurten baino zorte hobea dudan. Rally-a egitea asko gustatuko litzaidake, baina oso garestia da, eta oraingoz konformatu beharra daukat. Baina etorkizunean nork daki.