Festak amaitu bezain laster edo oraindik amaitu gabe daudenean, datorren urteko ekintzak zein izango diren pentsatzeari ekiten diote Zikuñaga auzoko Jai Batzordeko kideek. Aurtengoan haurrentzako egun bat izateaz gain, kontzertuak, danborrada, helduentzako txapelketak eta auzoan ohitura bihurtu diren sagardo dastaketa eta tortilla lehiaketa ere izango dituzte, besteak beste. Aurten, lau eguneko festak izango dituzte, Zikuñagako Amabirjinaren eguna, irailaren 8a, hau da, gaur delako. Arrazoi hori medio, festak beragatik ospatzen dituztenez, gaur hastea erabaki zuten. Lehen mezak eta erromeriak egiten ziren, eta jada egiten ez direnez, Amabirjin egunean hastea ideia ona zela pentsatu zuten batzordeko kideek.
Gaur, haur eta helduentzako pilota txapelketa
Gaur, 16:00etan, haurrentzako sorpresatxo batekin ekingo diote festari. Buruhandietan inoiz egin ez duten zerbait egingo baitute, oraindik kontatu ezin dena.
Ondoren, 17:00etan, haurrentzako pilota txapelketa egingo dute aurreko urteko moduan: «Haurrak gustura aritu ziren eta Asier Olaizola pilotaria etorri zen gu laguntzera, horrek bizitasuna eman zion. Aurten ere gonbidapena luzatuko diogu, ea azaltzeko aukera izaten duen», dio Jai Batzordeak.
Aurten gainera, haurrentzako txapelketaz gain, helduentzako ere egin nahi dute eta jendea animatzea espero dute. Arratsaldean helduentzako futbito txapelketa izaten da, bertan nahi duenak parte hartzen du eta partiduaren une berean egiten dituzte taldeak. Normalean lau talde inguru osatzen direnez, semi-final modukoak egiten dira.
Haurren eguna, bihar
Haurrentzako eguna izango da bihar. Eurak izango dute protagonismo osoa arratsaldeko 18:30ak bitartean. Goizean jokoak, graffitiak eta puzgarriak izango dituzte. Eta arratsaldean buruhandiak, tailerrak eta Martutene taldearen aurkako futbito partidua.
Horren ostean, lehenengoz, danborrada egingo da auzoan eta ondoren, DJ Txus arituko da gaua girotzen.
Ekintza ugari, larunbatean
Urteroko moduan tortilla lehiaketa eta sagardo dastaketa izango dira goizean.
Arratsaldean, 15:30etan, Uraren guda egingo dute. Bertan auzotar gehienek parte hartzen dute eta helburua beste guztiak bustitzea izaten da. «Momentu horretan Zikuñaga auzotik pasatzen den oro etxera bustita iristen da», dio Jai Batzordeko kide den Harkaitzek.
Azken urteetan irrintzi lehiaketak garrantzia handia hartu du auzoan, azken hiru urteetan irabazlea pertsona bera izan delako eta auzotarrak titulu hori kentzen saiatzen direlako.
Eguna amaitzeko, urtero bezela, kontzertuak izango dituzte: Aurtengoan, Hernaniko Pandemia eta Tolosako Potentor talde heavyak arituko dira.
Pilotako finalak, igandean
Igande goizean, haurrentzako marrazki txapelketa izango da. Azken urteetan agertu diren haur guztiak kontutan hartuta lehiaketa hiru mailatan banatzea erabaki dute, haur gehiagok saria lortzeko. Irabazleen sariaz gain, parte-hartzaile guztiek diploma bat jasoko dute.
Egunean zehar bote, igel eta toka txapelketak izango dira haur eta helduentzat. Ondoren, esku pilotako finalak, merienda auzotarrentzat, eta amaitzeko, zezensuzkoa.
ZIKUÑAGAKO JAIAK-EGITARAUA
Irailak 8, osteguna - Zikuñagako Amaren Eguna:
16:00 Buruhaundiak
17:00 Esku Pelota
txapelketa haurrentzat, finalerdiak
Ondoren, helduen
txapelketa
20:00 Futbito Txapelketa, finalerdiak
Irailak 9, ostirala - Umeen Eguna:
10:00 Haurrentzako jokuak
10:00 Graffitiak
12:00-14:00 Puzgarriak
16:00-18:00 Puzgarriak
16:00 Buruhaundiak
16:00-18:30 tailerrak
18:30 Haurren Futbito partidua: Zikuñaga F.T. / Martutene K. E.
20:00 Danborrada
23:30 DJ Txus
Irailak 10, larunbata:
12:00 Tortila Lehiaketa
12:30 Sagardo probaketa
15:30 Urarekin gerra
17:30 Euskal probak
19:00 Txokolatada
19:30 Futbito finala
21:30 Afari herrikoia
23:30 Irrintzi Lehiaketa
00:00 Kontzertuak: Pandemia eta Potentor
Irailak 11, igandea:
11:00-13:00 Marrazki Lehiaketa
11:30 Bote, igel eta
toka txapelketak
haurrentzat
17:00 Bote, igel eta
toka txapelketak
helduentzat
18:00 Esku pelota finalak
20:00 Merienda
auzotarrentzat
21:00 Zezensuzkoa eta jaien amaiera