Udara azken txanpan den honetan, Hernaniko denda eta komertzioek dendetan dituzten azken arropa eta produktuak jarriko dituzte aukeran gaur eta bihar, Stock Azokan. Gaur, arratsaldez izango da aukera, 17:00etatik 20:00etara, eta bihar goizez, 10:00etatik 14:00etara. Bihar gainera, umeentzako puzgarriak jarriko dituzte, gurasoek erosketak lasai egin ditzaten.
13 postutan, denetariko aukera
Urtetik urtera indar gehiago ari da hartzen azoka, eta aurten, 13 dira bertan postua jarriko duten merkatari eta komertzianteak. Denetariko produktuak izango dira aukeran, hala nola, moda, konfekzioa, kirol arropa, poltsak, konplementuak, etxerako produktuak, umeentzako jantziak, arropa. Gainera, merkealdiei bukaera emateko antolatutako azoka dela kontuan izanda, produktuak prezio merke eta eskuragarrian eskuratzeko aukera izango da.