«Ez nuen karrera ona egin, baina ahal bezala, aguantatu egin nuen podiumeko postuetan»

Goizeko 06:30ak. Tampere herria, Finlandia. Europako triatloilari onenak saltatu dira uretara. Hotz egiten du, oso hotz, eta uraren 18º-ek ez dute gorputzik bero­tzen. Her­na­niar bat da tartean: Peru Al­fa­ro. Igerian diferen­tzia atera­tzen die beti aurkariei, eta to­pera atera da, dituenetan. Le­he­nengo taldetxoan iritsi da, uretan 4 km egin ostean. Ha­siera ona. Baina nekatuta dago.

Bizikletan 120 km egin be­har ditu orain. 40 km­/or­duko abiaduran egin ditu 120 km-ak, eta bigarren postuan da.

Korrika ez du hain gustokoa; eta aurrean zain, 30 km gogor. Biga­rren postuari eusten saiatuko da. Sufritzen ari da, eta sen­tsazio kaxkarrak ditu. Hala ere, km bakoitza 3:50 minutuko median ari da egiten. 25 km egin eta gero, Jarmo Hast finlandiarrak pasa du. Hura etxean izaki, eta ani­mo guztiak berekin. Lau kilometro falta. Hiru­ga­rren postua ere ez da txarra. Iaz deskalifikatu egin zuten Al­faro, hirugarren postuan bu­katu eta gero. Dis­gus­to hura kendu ezinda ze­goen hernaniarra. Baina aurten lortu du arantza hura atera­tzea. Majo sufrituta, baina hirugarren postua, podiuma, eta mundialerako txartela, hernaniarrarentzat. Azaroa­ren 5ean izango da, Las Ve­ga­sen. Bejondeiola!

«Intentzioa horixe zen, podiumean sartzea»
Peru Alfarok Kronikari emozioz adierazi dio, gustora da­goela, helburu nagusia beteta: «Podiumean sartu nahi nuen. Mundialerako txartela lortzeko, batetik, eta bekak emateko eskatzen dutelako, emaitzak onak izatea. Nire lorpenik haundiena da, eta pena bakarra daukat, hobeto ere egin ne­zakeelako». Alfarok Euro­pako brontzezko domina lor­tu zuen igandean Finlandian, triatloi luzeko txapelketan, eta Mi­quel Blanchart ka­ta­lanak eta Jarmo Hast finlandiarrak ba­­karrik lortu zuten hernaniarraren au­rre­tik geratzea. Bost ordu eta 38 minutu behar izan zituen hernaniarrak proba bukatzeko eta oraindik denbora hobea egin zezakeela uste du; horixe pena bakarra. «Asko sufritu nuen hasieratik. Denbora ho­bea egin dezaket, eta alde ho­rretatik ez nago erabat gustora. Igerian eta bi­zikletan atera nuen margenari esker, lortu nuen podiumari eustea».  

Hernaniarrak dio, oraindik baduela mejoratzeko margena, batez ere ko­rrika. Hiru helburu ditu bu­ru­an: «Las Ve­gaseko Mun­dia­la, azaroan; Gastei­zen jokatuko den Munduko Txa­pel­keta datorren uz­­­tailean; eta Hawaiko Ironmana, 2013an. Ilusioz nago, oraindik badudalako zer hobetua; korrika, batez ere». Orain­goz, bide onean da hernaniarra!

Europako 10 onenak - ‘Top 10’

1-Miquel Blanchart (CAT)                 05:33:07
2-Jarmo Hast (FIN)                         05:37:32
3-Peru Alfaro San Indefonso (EUS) 05:38:26
4-Petr Vabrousek (CZE)                   05:38:53
5-Emil Dalgaard (DEN)                    05:39:05
6-Matteo Annovazzi (ITA)                 05:39:47
7-Jaroslav Kovacic (SLO)                  05:39:57
8-Richard Calle (CAT)                      05:40:41
9-Nikolay Yaroshenko (RUS)              05:40:43
10-Rasmus Petraus (DEN)                05:41:33