Miguel Mari Urrutia Buruz Buruko Kutxa Torneoko lehenengo finalista da Julen San Migueli 16-30 irabazi ostean, atzo. Bi atzelarien arteko norgehiagokak hasiera ederra izan zuen. San Miguel zuzen aritu zen eta markagailuan aurretik jarri zen 8-4 eta 10-6. Biak jokoan sartuta ibili ziren eta erremonte zaleek asko gozatu zuten.
Urrutia Iak sakea berreskuratu zuenean, 10-6an, partiduaren itxura aldatu egin zuen eta San Miguelen gainetik pasa zen. Partidua guztiz dominatzen hasi zen. Doneztebekoak ez zuen batere gaizki jokatu, baina saldiastarra ezinhobeto aritu zen. 10-6tik 10-15era eta 12-22ra pasa zen eta partidua erabakita utzi zuen.
Garaipen honekin, Urrutia Ia Kutxa Torneoko finalean da eta txapela lortzeko hautagai nagusia da. Ezkurrak eta Urrizak jokatuko duten finalerdia datorren larunbatean izango da, eta finala, irailaren 3an.
Gaur, lau partidu
Gaur, arratsaldeko 16:00etatik aurrera, lau partidu jokatuko dira Galarretan. Honakoak, partiduak: Matxin VI-Zubiri/Oñatz-Saldias (35 tantotara); Juaristi-Lizaso/Urtasun-Etxeberria III (40 tantotara); Matxin III-Aizpurua II/Endika-Agirrezabala (40 tantotara); eta Matxin IV-Urko/Zulaika-Olazar (30 tantotara).