Sagardo Lehiaketa eta herri kirolak, gaur Ergobin

Ergobiko jaiak aurrera doaz eta gaur, Sagardo Lehiaketa eta herri kirolak izango dira nagusi. Sagardo Lehiaketak mende erdia beteko du gaur eta nahi adina sagardo proba­tzeko aukera egoteaz gain, pintxoak ere izango dira. Goi­zeko 11:30etan izango da hori, Meza Nagusiaren ondoren.
Herri kirolak, berriz, arra­tsal­­dean izango dira, 18:00e­tan, eta bertan, momentuko ha­rri ja­sotzaile onenak ikusi ahal izango dira: Perurena aita-semeak, Izetatarrak, Irigo­yen eta Urdax.

Desafioak
Harrijasotzaileen ondoren, 20:00e­­tan, Er­go­bia eta Astiga­rraga aurrez aurre izango dira trontzan. Er­go­bitarrak erreban­txaren bila dabiltza. Eta gaueko 23:00etan, beste desafio bat: Paollaren zaldia eta Oiar­tzungo 9 lagun 900kg-ko ha­rriarekin, zeinek buelta gehiago eman.

Igartzabal eta Oiartzabal krosseko irabazleak
Ostiralean, Ergobiko IV. Kross Herrikoia izan zen eta Zuma­rragako Juango Igartzabal izan zen bizkorrena. 33 minutu eta 44 segundotan egin zituen 10 km. Bigarrena, iaz bezala, Ibai Alba hernaniarra izan zen, 34 minututan bukatu zuen lasterketa. Emakumez­koetan, berriz, Lezoko Lurdes Oiartzabalek irabazi zuen, 41 minutu eta 43 segundoko denborarekin. Aur­ten, krossa, la­run­batean egin beharrean osti­ra­lean egin da eta iaz baino jen­­de gehiagok hartu du parte. De­nera, 111 lagun aritu ziren korrika.