Mikel Aginagalde
Aurreko denboraldian Gasteizko Europako Txapelketako deskalifikazoak sortutako atsekabearen ondoren, zein da zure helburu nagusia aurtengo edizioan?
Egia esan pena haundia izan zen hirugarren iritsi ostean kanporatua izatea, baina orain indar berrituta nago eta guztia emateko prest. Helburu nagusia podium postuetan egotea da, horrek Munduko Txapelketan parte hartzeko txartela emango bailidake, eta baita laguntza ekonomikoa lortzeko aukera ere. Gainera, ez dut baztertzen lehenengo postua lortu eta txapeldun izatea.
Zeintzuk uste duzu izango direla lehiakide gogorrenak?
Azken boladan indartsu ari diren Rasmus Stubager eta Jens Petersen danimarkarrak dira kontutan hartzeko aurkariak, baita Massimo Cigana italiarra ere. Bestetik, txapelketa Finlandian izanik, bertako triatloilariek motibazio berezia izango dutela eta aurrean ibiliko direla uste dut. Horiez gain, Miquel Blanchart eta Richard Calle Martinez espainiarrak ere goiko postuetan izango dira seguru.
Nola prestatu duzu triatloia? Zenbat ordu entrenatzen dituzu egunean?
Orain profesional mailan aritzen naiz eta denbora gehiena entrenatzeari dedikatzen diot. Orokorrean, bi modalitate lantzen ditut egunero, baina batzutan hiru kirolak ere egiten ditut (korri, igeri eta bizikleta). Madrilen bizi eta entrenatzen naiz, eta normalean goizean bizikletan ibili edo korri egiten dut eta arratsaldean, berriz, igeri. Astebetean 25-30 ordu inguru entrenatzen ditut, nahiz eta txapelketa astean bertan, entrenamendu bolumena gutxitzen dudan.
Zein modalitatean uste duzu abantaila lor dezakezula?
Txapelketa guztietan igerian aurreko postuetan amaitzen dut, indartsu ibili izan naiz betidanik. Hala ere, azkenaldian hiru disziplinetan hobekuntza izan dut, batez ere korrika. Horregatik, aurrean egoteko aukera handia dudala uste dut.
Zergatik uste duzu jarri dela modan triatloia azken urteetan?
Kirol berria da eta hiru kirol ezberdin uztartzen dituela kontuan izanik, jendea berehala harrapatzen du, are gehiago txapelketa batean lehiatu ostean. Gainera, ez duzu egunero egunero kirol berdina landu behar eta horrek entrenamenduak arinagoak egiten ditu. Horrez gain, superazioa da benetan gogobetetzen zaituena.
Etorkizun motzera begira
zeintzuk dira erronka nagusiak?
Aurrera begira goi mailan lehiatzen jarraitzea da nire asmo nagusia, markak hobetu eta munduko onenen artean egotea, alegia. Hala ere, nire benetako ametsa Hawaiko Ironmana egitea da, eta hori lortzeko borrokatuko dut gogor.