Urtero egin bezala, Donostiako Aste Nagusiaren barruan, Paseo Berriko Trabesia antolatu zuen Fortuna kirol taldeak astelehenean. Eta bertan, Peru Alfaro hernaniarra bigarren geratu zen irabazletik lau segundora. Adnan Mustafic txapeldunak, 40 minutu eta 4 segundo behar izan zituen 2.959 metroko trabesia egiteko. Hirugarrena, Jaime Caballero izan zen Alfaro baino segundo bat beranduago iritsita helmugara. Emakumezkoetan, Ainhoa Oñatibiak irabazi zuen 44 minutu eta 28 segundoko denbora eginda.
Luis Goñi laugarren,
bere mailan
Alfaroz gain, hernaniar gehiagok ere hartu zuten parte. Guztira, hernaniar gisa izena emanda parte hartu zutenak 10 izan ziren, eta horien artean izan zen Luis Goñi. Goñik 9garren egin zuen orokorrean, eta 4garren, masterrean. Denbora: 00:41:51. Goñi, Gipuzkoako Ligan, 39garren postuan dago sailkapen orokorrean eta 16garren bere mailan. Ligako sei trabesiatatik hiru jokatu dira eta bitan hartu du parte iazko txapeldunak. Hurrengo proba, Irlako trabesia, abuztuaren 28an izango da.
HERNANIARREN SAILKAPENA:
2. Peru Alfaro 00:40:08
9. Luis Goñi 00:41:51
65. Txomin Mugica 00:51:44
69. Aitor Huici 00:51:50
108. Mikel Aramendi 00:54:53
109. Janire Ezeiza 00:54:54
146. Oscar Gonzalez 00:58:26
261. Alberto Arenales 01:07:28
296. Joxeba Iurramendi 01:11:51
340. Jose Mari Alvarez 01:25:38
*Antolatzaileek emandako datuen arabera, horiek izan dira hernaniar gisa izena emanda parte hartu dutenak.