Jesus eta Ander aita-semeak, punteri finenen artean, Espainiako txapelketan

Txantxangorriko tira­tzaileak fin dabiltza, sariak ekartzen ari baitira, joaten diren txapelketara joaten direla. Uztailaren 29tik 31ra Plater Tiroko Espainiako Txa­pelketan, Jesus Arrietak irabazi egin zuen Bigarren Mailako txapelketa, eta bere semeak Anderrek, hirugarren saria irabazi zuen, Sailkapen Orokorrean.

200 plater eta 182 tiratzaile, zeinek gehiago joko
Arrieta aita-semeek txapela kentzeko moduko lana egin zuten, Lleidan jokatu zen txapelketan, Port Ainé Rialp-eko tiralekuan, eta Compak Sporting modalitatean. Tira­tzaile asko inguratu ziren bertara, 182 guztira, bakoitza punta banatatik etorria. 200 plater pasa zitzaizkien aurrean, eta ia denak bota zituzten bai aitak eta bai semeak. Anderrek 186 bota zituen; Jesusek, 168. Etxeko bitrinak betetzen ari dira arrietatarrak, eta orain badituzte beste bi sari, lehendik irabazitakoen ondoan jartzeko.