Ostiral goizean Urumea Herrigunea tapiatu zuten. Aspaldi bagenekien hurrengo hilabeteotan Urumea botako zutela, beste behin proiektu urbanistiko-espekulatiboari bide emanez. Aste honetan, aldiz, bi eguneko epearekin udalak jakinarazi zigun espazioa hustu eta tapiatzeko asmoa zuela.
Bi egun soilik bertan bizi direnentzat eta bertan proiektuak burutu izan dituztenentzat, guztia berrantolatzeko.
Duela lau urte Urumea Herrigunea deitu diogun espazioa okupatu genuen: gune autogestionatu eta autonomoa izan da, transfeminismoaren eta antiespezismoaren aterkipean. Urte guzti horietan proiektu ezberdinak garatzeko aukera izan dugu modu egonkor eta seguruan, besteak beste, serigrafia, musika taldeen entseguak eta grabazioak, zinemaldiak, eskultura, joskintza, elikadura ekoizpen autonomorako proiektuak, formakuntzak, topaketak eta afari/bazkariak. Azken finean, kolektibo askorentzako bilgunea izan da.
Hernani horrelako espaziorik gabe geratu da. Une honetan, bereziki, horrelako espazioen garrantzia azpimarratu nahi dugu. Okupazioa aurrera!
Horrez gain, Urumea etxebizitza eta babeslekua izan da sistemaren bazterretara kondenatuta dauden gazte migrante eta arrazializatuentzat. Instituzioek betetzen ez duten lana bete dugu, hori konponbide xumea izan bada ere. Etxebizitza bizitzeko oinarri-oinarrizko beharra da eta etengabe urratzen da horretarako aukera. Orduan, zer? Udal, instituzio, herri mugimendu eta herritar orori zuzendurik, zein dira herri mailan ditugun estrategia eta moduak pertsona orok etxebizitza izan dezan? Inor ez kale gorrian!
Olaia Auzmendi Sarasa
Urumea Herrigunea