Bertako arrainei traba egiten dietela aitzaki hartuta, Madrilen egoitza duen Rios con Vida erakundeak eta Eguzki elkarte ekologistak Ereñotzuko presa botatzeko eskaera abiatu dute. Izokin nahiz amurrainak igotzeko pasabideak hobetu eta eguneratzeko beharra dagoela argi dago: aspaldi egindakoak dira eta ziurrenik ez dute euren funtzioa behar bezala betetzen. Horrexegatik, egungo pasabidea handiagotu eta birdiseinatu behar da. Hala ere, esan behar da izokinak pasabide hortan igo igotzen direla. Tamalez, errekaren kalitatearekin zerikusi handiagoa dute inguruko industriaren azken urteetako aktibitateak eta errekara egiten diren isurketek. Arrazoi honengatik 2017an Gipuzkoako Foru Aldundiak hainbat enpresa ikertu zituen. Bestalde, azken urteetan, hemengoak ez diren gartza eta kormoroien kopuruak gora izugarri egin du eta hauen arrantzarako trebeziak eragin zuzena du bertako arrainen hazkuntzan. Beraz, gure bailarako istorio eta ondare den presa bat botatzeak ez du aparteko eraginik izango bertako arrainengan.
Bestalde, Europak energia berriztagarrien apustuan hidroelektrikoetan eginiko inbertsioak gora egin du azken urteetan, izan ere, energia garbia eta errentagarritasun handikoak direlako. Horren adibide dira, Urumea errekan gora eginez, Goizuetan Acciona-energia enpresak duen zentral hidroelektrikoa, non 2,5MW-ko energia lortzen duen.
Hortaz, presa eta egungo instalazioak suntsitu eta energia berriztagarriei ateak itxi beharrean, manten ditzagun egungo instalazioak etorkizun laburrean energia berriztagarriak abian jarri ahal izateko; inbertsio justifikatuago bat egin dezagun arrain eta izokinen pasabide zaharkituak eguneratzeko eta jarrai dezagun borrokan gure errekak merezi duen ur kalitatea sustatu eta bermatzeko.