Urumearekin zerikusia duten gaiak behar lukete 'Jasota bezala' atal moduan bidali beharrekoek; zer litzateke bada Urumea, Kronikako eta Dobera Euskara Elkarteko lagunen berotasunik gabe?
Behin zuetako batek galdetu zidan: horrela imaginatzen zenuen Kronika? eta horrek hausnarketa batera bultzatu ninduela aitortu beharra dut. Ba ez, ez nuen halakorik irudikatzen. Uste baino hobea izan da, hedabide txikia da noski, baina oso-oso hurbilekoa. Konfiantza izugarria jaso dut, eta lana nahi eran egiteko askatasun osoa. Egoera lehenengo egunetik ulertu izanagatik ere mila esker, baita ordutegiarekin emandako malgutasun guztiagatik, eta praktikak unibertsitateko ikasketekin eramangarriak egiteagatik! Lehenengo egunetik jarri ninduzuen lanean, eta hori eskertzekoa da ongi baitakizue zuek zer den praktiketan dabilen hasiberri batentzat berak idatzitakoa hurrengo egunean argitaratua ikustea. Nire buruarengan ez nuen segurtasun hori emateaz arduratu zarete, eta hortaz 'horren gaizki' egin ez dudala sinetsita aldegitea barkatuko didazue.
Gaizki ulertu eta sorpresak izan dira, egunen batean gehiago besteetan baino, baina tira, eskerrak horiei ere, dena festa girorako aitzakia ona baita; elkarrizketatuari ordua joatea, elkarrizketatzailea orduz nahastea, masterra hemendik, plenora korrika handik, eskela gehiago sartu ez zitezen errezoak bestetik…
(...) Urumeako bailarak jakin beharko luke zein talde bikaina sortzen duzuen, hortaz hori azpimarratzen tematuko naiz. Lerro hauen bitartez eskerrak eman nahiko nizkizueke lan talde osoari, irailetik honako arratsalde didaktiko hauen parte egin izanagatik, eta halako aukera eman izanagatik, mila esker. Besarkada goxo bat denentzat, eta Larramendiko ate hori berriro ere zeharkatzeko irrikitan agurtzen naiz!