Harluxet hiztegiak “maiztasun berberaz errepikatzen dena edo irauten duena” definitzen du konstantea. Eta hauteskundetan, Hernanin nahiz beste zenbait lekuetan, abstentzioaren datuek konstante adierazkor bat erakusten dute. Errenta gutxien dituzten auzoetan abstentzioa handiagoa, askoz handiagoa da, errenta gehien dituzten auzoekin konparatuz. Hernanin, azken hauteskundetan, pertsona bakoitzeko bataz besteko errenta txikiena duen hauteskunde-atal 8an (Akarregi, Martindegi, Osiñaga, Zikuñaga) abstentzioa %41,17koa izan da, herriko handiena, eta berriz herriko abstentzio txikiena, %27,59koa, herriko errenta handiena duen atal 15ean (Aristizabal, Iturregi, Marieluts). Aldea 13,6 puntukoa da, esanguratsua. Hauteskundeak joan, hauteskundeak etorri, konstantea errepikatzeak fedegabetasuna adierazten duela pentsatzen dut, hain zuzen, eta arrazoi guztiz, gizarte bidegabe hau aldatzeko, egungo sistema sozial, ekonomiko eta politikoan, gutxien dutenen fedegabetasuna.