Gizon jator batek esan zidan berak beti ezkerra bozkatuko zuela, EAJ-PNVk ezkerretik ez zuela ezer antzemanez.
Urte batzuk daramatzat herri politikagintzan eta gero eta konbentzituagoa nago estereotipoetatik ihes egin behar dela. Udaletxe honetan, EAJ-PNVk eskatu du obra publikoak egiten dituzten enpresei derrigortzea Gipuzkoako hitzarmenak markaturiko soldatapean edukitzea beraien langileak; argi eta garbi borrokatzen dugu, Udalean sortzen den aberasatasuna banatzea herriko enpresa guztien artean; diru-laguntzetan eskatzen dugu gutxiena dutenek laguntza gehien jasotzea; uste dugu administrazioak enpresekin lan egin behar dutela bakarrik kutsaduraren inguruan arauak betetzen dituztenekin, langileek soldata duinak eta parekideak dituzten enpresekin; pentsatzen dugu derrigorrezkoa dela beti hernaniarren eskakizun eta galderei erantzutea. Gobernatu genuenean hirukoiztu egin genuen etxez etxeko laguntzaren zerbitzurako dirua; eguneko zentrurako plazak gehitu ziren; eta jarraitu nezake.
Egia da enpresa pribatua ere babesten dugula lan eta aberastasun iturri delako. Ez dugu etsaitzat hartzen, baizik eta ezinbesteko lagun bezala. Beraiek eta euren langileak izan dira gaur egun Euskadi dagoen lekuan egotearen erantzunkizuna dutenak.
Eta azken gogoeta, behar duenari laguntzeko; ez da beharrezkoa rastak, mototxak, motxilak edo galtzerdiekin sandaliak eramatea. Ziurtatu dezaket, eta egindakoa ikusi besterik ez dago, idatzi hau sinatzen duenak amerikanak eta zapatak janzten ditu, EAJ-PNVkoa da eta hernaniar guztien ongizatea bakarrik bilatzen du, arrazari, erlijioari, sexuari edo, oso garrantzitsua gure herrian, hurbiltasun politikoari erreparatu gabe. Horretarako dago EAJ-PNV.