Gogoratzen Lluis Llach katalanaren L’Estaca hura? «Hik bultza gogor hortikan/Ta bultza nik hemendikan/Ikusiko dek nola-nola/Laster eroriko dan». Francisco Francoren diktadura salatzeko egindako kantak balio du Zubietako erraustegiarentzako ere: eroriko da, geldituaraziko dugu denon artean.
PNVko eta PSOEko agintariak tematu dira Zubietako erraustegi kriminal hori eraikitzen. Demostratuta dago osasunari kalte egiten diola, gaixotasunak eragiten dituela, sekulako zorra ekarriko digula herritarroi (gaurkoei eta gure umeei ere bai), ingurua kutsatuko duela, alternatiba hobe eta merkeagoak badaudela, enplegua eta zerbitzu sozialak sakrifikatzen ari direla erraustegi hori egiteagatik…
Arrazoi guztiak esan dizkiegu, baina ez dute entzun nahi. Datorren larunbatean, urriak 27, berriro joango gara Donostiara «Erraustegia gelditu» oihukatzera, Erraustegiaren Aurkako Mugimendua, GuraSOS, OEIT (Osasuna eta Errausketa Ikerketa Taldea), ELA, LAB, CCOO, ESK, STEILAS, EHNE, HIRU, Eguzki, Ernai, Gipuzkoa Zutik, Greenpeace eta No+Precariedad elkarteek deituta.
Hernanin nahikoa kutsadura badaukagu lehendik ere, ondo-ondoan daukagu beste erraustegi bat (zementu fabrikaz mozorrotuta) Añorgako Rezolan. Hernanin egunero erakusten dugu erraustea alferrikakoa dela, gure hondakinak txukun bildu eta kudeatzen dituelako Udalak.
Ez sinetsi politikari gezurtiei: dena hormigoiz bete nahi duen patronalari salduta daude. Ez etsi, hernaniarrok, eutsi. «Erraustegia gelditu».