Hernaniko Gure Esku Dago Mugimenduak, irailaren 30ean ekitaldi bat antolatu zuen, non, zinta horiak banatu ziren kalean eta hernaniarrek gero, lazo eta besarkada bihurtu zituzten eta batez ere Tilos Pasealekua horiz jantzi genuen denon artean. Ekitaldi honek helburu bikoitza izan zuen. Alde batetik, Kataluniari elkartasuna adieraztea, eta bestetik, Euskal Herriaren erabakitzeko eskubidea aldarrikatzea behin eta berriz.
Pozez esan behar dugu 1500 besarkada osatu zirela eta jarrera honekin jarraitzea eskatzen diogu Hernaniko herriari. Kataluniak merezi duelako gure elkartasuna, eta horrela Euskal Herriaren erabakitzeko eskubidearen sugarra bizirik mantenduko dugulako, helburuak bideratu eta lortu artean.
Bestalde, hernaniarrek badakite GEDk kalean jartzen dituen kartel, pankarta, e.a. gero erretiratu egiten dituela, herria garbia utzirik, errespetuz eta gizalegez jokatzearen aldekoak garelako. Orain ere berdin egingo dugu. 15 egun eduki ondoren, datorren astelehen arratsean, jarritako zinta guztiak erretiratu eta jaso egingo ditugu.
Miren Recondo Leibar
Gure Esku Dagoren izenean