Bolo-bolo dabil Handia filma; Oscar saria lortzeko lehian aritu omen daiteke. Proiektuaren lemazainak, orain, denen ahotan dabiltzan arren, hasierak ez ziren errazak izan eurentzat. Lanaren ondorioz etorri dira emaitzak. Eta baita, sariak, txaloak…
Guk ere, urrutira joan gabe, badugu nor zoriondu. Beste urtebetez Maialen trainerua ETE (Emakumeen Traineruen Elkartea) ligan aritu da. Aurten, herrikideez gain, Zumaia eta Alacanteko lagunekin osatu dute trainerua; denen artean, gure herriaren izena han eta hemen zabalduz. Hernanin, arrauna, ez dagoela lehor, blai baizik aldarrikatuz. ‘Lehorrekoak’ izan arren (ez dugu itsasoa eskutik eskura) erakutsi duzue badakizuela lehiatzen. Handia egin duzue!
Jakina da, bidea –proiektu bat– gauzatzeko, askotan, lana isilpean egin behar dela. Norabidea ikasteko sherpak behar direla, eta horretan zabiltzate zuek maldan gora. Atzetik etorriko direnei bidea erakusten. Iritsiko da udara bat, herriko balkoietan oihal berdeak ikusiko ditugunak emakumeen trainerua animatuz. Baita bandera, lepoko-zapi eta elastikoak estropadetan ikusteko garaia ere. Baina bien bitartean lanean jarraitzen duzue. Urte guztian gainera; batelak; trainerilak; trainerua. Zuenak ez du etenik. Bai lorpen Handia!
Hemen da Kontxako bandera handia. Iazko bigarren igandeko jardunaldia ondo gogoan dugu. Nola ez! Neptuno haserre esnatu zen egun hartan baina itsasoratu, hortzak estutu, eta sailkapen nagusian seigarren postuan sailkatu zineten. Handia egin zenuten gero!
Bihar, kanporaketan parte hartuko duzue, eta guztia ematera aterako zarete. Datozen bi igandetan Donostiako badian arraun egiteko txartela lortu edo ez, aldez aurretik, zorionak! Handiak zarete gero!