Ion Azpiazu Goñi
Artikulu bat irakurri genuen egunkarian, txotxaren soluzioari buruzkoa. Kaxkoko desordena konpontzeko arrisku haundienetakoa da, horretan lanean ari direnen autokonplazentzia. Hasteko, esan behar dugu ez dela txotx garaian bakarrik ematen den arazo bat.
Arazoa konpondu behar dutenak dira, besteak beste, urte asko daramazkitenak desorden horretatik onurak lortzen.
Udaltzain kopurua nahikoa izatea edo ez, komertzioak beraien inguruan jaso beharrekoa jasotzea edo ez, ez da Kaxko elkarteak edo bizilagunek konpondu beharreko arazo bat; Denis Itxasok dioen moduan, estrategia bat bilatu behar dugu, galaraziko duena bisitariak sektore harrapakari bilakatzea, azkeneko urteotan gertatzen ari den bezala.
Horretarako, Kaxkoko bizilagun talde batetik, eskatu diogu Kaxko elkarteari, terminoei buelta eman diezaiela, eta bilatu dezala desordenetik etekina ateratzen duten horiek izatea soluzioa bilatuko dutenak; eta bitartean, lehentasuna eman diezaiola, Hiritarren Elkarbizitzarako eta Kale Erabilera eta Garbiketarako Udal Ordenantza aplikatzeari.
Aurreneko kapitulua. Xedapen orokorrak:
7. artikulua; b atala: arautzen du kanpoan kontsumitzeko edariak zerbitzatzea.
10. artikulua: debekatzen du kalean edalontziak, botilak eta freskagarri latak uztea.
11. artikulua: zehazten du establezimenduaren jabeak garbi mantendu behar duela dagokion kale zatia.
Ziur gaude, arau horiek aplikatzeak, hobetuko duela Hernaniren egungo irudia; legerik gabeko herriarena, non denak balio duen.