Azkeneko plenoan mozio bat aurkeztu zuten pentsio duin batzuen alde. Bertan jasotzen zen 1.080 euroko gutxieneko pentsioa eta Euskadirentzat Gizarte Segurantzako sistema propioa ezartzea. Eta eskatzen ziguten alderdi politikooi hura babesteko; baina Alderdi Sozialista abstenitu egin zen.
Gutun hau idatzi dut, gure jarrera azaltzeko.
Ez da ez dugula babesten 1.080 euroko gutxieneko pentsioa, nahiko genuke hala izango balitz! Uste duguna da egoeraren arabera aztertu beharreko kopurua dela; ez delako gauza bera bakarrik bizi den pentsioduna, alokairua edo hipoteka ordaindu behar duena, eta 1.080 euro besterik jasotzen ez dituena, gehi dagozkion laguntzak; edo 1.080 euro bana (2.160 euro) jasotzen dituen bikotea, gehi dagozkien laguntzak. Bakoitzak bere kotizazioaren arabera eta jubilatu zenean zeuden baldintzen arabera kobratzen du.
Euskadirentzat Gizarte Segurantzako sistema propioa eskatzen zuten baita ere. Ez da sekretua PSE-EEk ez duela babesten gizarte segurantzako kutxa bakarrarekin haustea, Espainia osoko langile eta pentsiodunen arteko elkartasuna ziurtatzen duena. 2015eko azterketa batek neurtu zuen Euskadiko Gizarte Segurantzako defizita 2.500 milioikoa zela; horrek esan nahi du Gizarte Segurantzak pentsio gehiago ordaintzen dituela, kotizazioengatik sartzen duena baino. Sistema propioa izanez gero, 2.500 milioi horiek ordaindu beharko genituzke.
Baina, gainera, Duintasuna elkarteak aurkeztutako mozioak helburu politikoa dauka. PSOE eta PP parekatzen ditu, gauza bera balira bezala; ulertzen dut badagoela jendea hori pentsatzen duena, eskubiko komunikabideei erreparatuta. Baita ere uste dut PSOEk hauteskundeetan ordaindu dituela bere akatsak. Baina eskaera konkretuez haratago, batasun gehiago nahi izanez gero, parekatzea alde batera utzi zezakeen. Hori zaila dela ulertu nuen plenoaren bukaeran baieztatu zidatenean, Duintasuna elkarteak ez duela Hernaniko pentsiodunen kolektibo osoa ordezkatzen.
Zorionez, pentsiodun askok mozioarekiko desadostasuna adierazi digute, baita aurkezteko moduekin ere, korrika eta presaka.
Abstenitu egin gara guregana hurbildu denaren errespetuz. Eta mozioa alde batera utzita, kontzentrazio eta manifestazioetara joaten jarraitzera animatzen zaituztegu, hau ez duelako inork geldituko! Ez da alderdi politikoen kontua, egungo eta etorkizuneko pentsioei buruzkoa da; pertsonen duintasunaz.