Eduardo Elosegi Erdozia
Erabakitzeko Eskubidearen inguruan, Herri Galdeketa egin genuenetik oraintxe da urtebete. Orduan 4.253 hernaniar izan ziren beren bozka uztera gerturatu zirenak. Kopuru oso garrantzitsua, zalantzarik gabe. Antolakuntza aldetik ahalegin handia suposatu zigun, baina Gure Esku Dagok ondo gainditu zuen erronka hura, lanerako borondatea erakutsi zuten ehunka hernaniarrei esker.
2018a erronka ederrez betea datorkigu. Eta epe laburrera bi ekimen garrantzitsu dauzkagu esku artean. Alde batetik Herritarron Ituna, eta bestetik ekainaren 10ean egingo den Giza Katea; hain zuzen, Donostia, Bilbo eta Gasteiz lotuko dituena.
Hernaniri, kate horren 4 kilometro betetzea dagokio. Gure herritik gertu izango da. Erronka handia, baina ziur gaude ekaineko erronka erakargarri horretan, berriro ere hernaniarren laguntza eta parte-hartzea izango dugula, bai antolakuntza lanetan eta baita eskuak eta sentimenduak batzen ere. Azken finean, hernaniarrak, pentsaera eta ideologia desberdinetako jendea izanda, askotan erakutsi dutelako prest daudela bat eginda joateko, helburua arrazoizkoa eta demokratikoa denean. Azken finean, askotan erakutsi baitute herri honen etorkizunarekin konprometituta daudela, besteak beste, Erabakitzeko Eskubidearekin.
Beraz, datorren ekainaren hamarra buruan, motorrak berotzen jartzera goaz, eta hasierako ekitaldia larunbat honetan bertan izango da, eguerdian Plaza Berrian ipiniko dugun mahaiarekin. Bertan hernaniarrei jakinaraziko zaizkie ekimenen nondik norakoak, eta aldi berean, jendearen iritziak eta ekarpenak jaso nahi ditugu, gure plangintzan sartu eta txertatzeko. Horrez gain, herritarren laguntzeko prestutasuna frogatu eta konpromisoak jasotzen hasiko gara. Eta eguerdian, ordubata aldera, pintxoak eta sagardoa elkarrekin dastatzeko aukera edukiko dugu.
Aldez aurretik eskerrik beroenak, larunbatetik aurrera zuen elkartasuna eskaintzeko prest agertuko zareten guztiei.