Olaia Uzkudun Askarai, GazteBizilagunak taldearen izenean
Egun, asko dira sistemak berak eraginik, egoera lazgarrian bizitzera bideratuak dauden pertsonak. Egoera lazgarri esaten dugunean, ordea, zeri egiten diogu erreferentzia? Norbera elikatu ahal izateko baliabiderik ez edukitzeari, garbiketa pertsonalerako espaziorik ez izateari, kaleko txokoetako sabaiez gain, lotarako zeurea den sabai bat ez izateari, eta abar. Gure behar erreproduktiboak, lehen mailako beharrak besteak beste, asetzeko zailtasunak dituzten pertsonak daude egoera horretan. Egoera honetan edozein identitateko pertsona aurki daiteke, izan gazte edo heldu, atzerritar edo bertako.
Euskara arrotza zaie askori honekiko hurbilpen faltagatik, eta, gaztelania bera ere, askok ez dute menderatzen. Horrek, lan mundura begirako formakuntzak jasotzea oztopatzen die, eta ondorioz, prestigio gutxiko enpleguetara soilik irits daitezke. Sistema kapitalistak langile oro zapaltzen badu ere, honako gazteak are zapalduagoak dira, zuzenean lan esplotatzaile eta prekarizatuetara bideratzen direlarik. Hala ere, gutxi dira enplegua lortzen dutenak, askok jan ahal izateko, bestelako alternatibetara jo behar izaten baitute, hala nola, tresna edota arropen kaleko salmentara, kontraturik gabeko orduzkako lan prekarioetara, eta abar.
Guk, aitzitik, ez dugu inor baztertzen bere testuinguru sozial eta ekonomikoa edozein izanda ere. Aurreiritzietatik at kokatzen dugu gure burua. Gure aldetik, sozializaziorako esparruak eraikitzen saiatzen gara, non gazte ezberdinen arteko harremanak indartzea helburutzat hartzen dugun. Hala ere, gure taldean egiten duguna ez da nahikoa beraien egoera hobetu ahal izateko; behar esentzial horiek asetu ahal izateko bestelako bultzadatxo bat behar baitute. Horregatik, GazteBizilagunakeko kideok BIGARREN ESKUKO AZOKA SOLIDARIOA antolatu dugu martxoaren 10ari begira. Honakoa, goizeko 11:00etatik arratsaldeko 14:00etara izango da Plaza Berrin. Beharrezkoa dugu herri osoaren inplikazioa, eta horregatik, irekiak gaude edozein material jasotzera. Harremanetan jartzeko deitu zenbaki hauetara: 669300447 (Olaia), 679567255 (Fatima); edota bidali mezua e-mail honetara: gaztebizilagunak@gmail.com.