¡A mi hijo no por favor!

PSOEko gurasoen seme-alabak ere atxilotzen zituztenean telefonoa astintzen hasten ziren hauek ere, gobernadore zibilari deika: «mesedez, nire seme-alaba ez dezatela torturatu, otoi, arren!» Dei lazgarria zen, bai baitzekiten zer gertatzen den Espainiako indar polizial-militarren esku eroriz gero.
Tortura sistematikoa izan da gatazka politikoaren ondorioz atxilotutakoentzat. Euskal disidentziari ezarri zitzaion ‘gerra politikaren’ parte bat zen tortura. Estatu espainiarrarentzat arma baliotsua izan da Euskal Herriaren aurka. Hernanin bertan euskal memoriak 131 kasu jaso zituen. Tortura, indarkeria motarik krudelena eta bihozgabeena da, askotan heriotza bera salbazio moduan ikusarazten duena.
Euskal Herriaren eskubide demokratikoak ukatzeko erabili den indarkeria ankerra da tortura.
Azken aldian, mundu guztiak zekiena «iritzi publikatura» ekartzeko urrats garran­tzi­tsuak eman dira. Tor­tu­ra­ren egia ezagutzeko euskal me­moriak bilketa lan mardula egin zuen eta, berrikiago, Pako Etxeberriak gidatutako txostena argitaratu da. 1960tik oraintsu arte izandako tortura kasuak jasotzen ditu, guztira 4.113. Azpimarratzeko modukoa da  ikertutako kasuen %78 ger­tatu direla 1978tik hona, Es­painiako demokrazia txit de­mo­kratikoan. Jaur­laritza­ren txos­ten honek izan diren tortura kasu guztiak ez ditu bil­tzen, baina oso esanguratsua da: Tortura sistematikoa izan dela frogatzen du.
Euskal Herrian, gaur egunean, Estatu espainiarrak baka­rrik erabiltzen du indarkeria eta bada garaia urratsak ematen hasteko. Torturaren aitortza egin beharko litzateke eta justizia trantsitzionala apli­katu. Tortura bidez lortutako kartzela-zigorrak balio­ga­­be utzi beharko lirateke.
Bitartean, guri tokatzen zaigu torturaren errealitatea eza­gutzera ematea eta Herna­nin torturatutako guztiei gure babesa eskaintzea. Ez dugu inoren seme-alabarik torturatzerik nahi. Horretarako elkarretaratze bat egingo dugu Plaza Berrin, asteartean, hilak 13, arratsaldeko zazpi eta erdi­etan. AITORTZA, ERREPARAZIOA, EZ ERREPIKATZEKO BERMEA.