Jesus Uzkudun Illarramendi eta Juan Batti Izagirre
Azken hilabeteotan, Hernaniko Gure Esku Dagok hainbat jarduera antolatu ditu, Kataluniako herritarrei elkartasuna adierazteko. Azkeneko egin duguna txoko bat antolatzea izan da, herrian barrena jarri izan ditugun panel guztiak toki bakar batean erakusteko.
Horretarako aukeratu dugun txokoa Karreroko parke txikia izan da, Juan de Urbieta kalean dagoena. Eta zer? Eta, nonbait, berriz ere, baten bati eragozpena sortzen dio horrek ere.
Zer da molestatzen dizuna/ dizuena?
Katalanei elkartasuna adierazteko eta Erabakitzeko Eskubidea defendatzeko herrian jartzen diren horma-irudiak hondatzen eta puskatzen ibiltzen denarentzat edo direnentzat da galdera hau.
Eraso horietako bakoitzean, katalanen sinboloak suntsitzen saiatzen zarete, eta gertatzen ari den hori jakinarazi nahi diegu hernaniarrei, bakoitzak bere ondorioak atera ditzan.
Katalunian, erabakitzeko eskubidearen alde ari direnei elkartasuna adierazten jarraituko dugu. Erasotzen duzuen kartel bakoitzeko, beste bat jarriko dugu; eta ez diogu hori erronka grinak hartu gaituelako, irmotasuna erakutsi nahi dugulako baizik.
Gure Esku Dagorekin konpromisoa hartuta dugun pertsonak ezagunak gara. Nahi duzuenean, gerturatu gugana eta kafe baten bueltan, hitz-aspertu bat egingo dugu lasai, elkarri entzun, iritzi guztiak errespetu osoz eman eta adostasunak bilatzeko.