Karlos Apeztegia Jaka
Hernaniko PSOEk 2017ko abenduan argitaraturiko berripapertxoa nire etxeko gutunontzian jaso nuen orain dela gutxi. Berripapertxo horrek izenburua Gure Hitza, Hernani, Nuestro Compromiso du, baina ez dirudi konpromiso hori euskararekikoa denik.
PSOEk zer dioen jakin nahirik, irakurtzen hasi nintzen eta gehienbat erdaraz idatzirik zegoela ohartu nintzen. Euskarari tarte txiki batzuk eskaini zaizkio, inortxok ere euskararekiko sentikortasunik ez dutela esaterik izan ez dezan edo, baina ia gehiena gazteleraz idatzirik zegoen. Eta euskaraz idatzitako tarte txiki horietan ere akatsak zeuden.
Beraz, berripapertxoan mezu gehienak gazteleraz zergatik argitaratu dituzten hausnartzen hasi nintzen eta honelako galderak bururatu zaizkit:
Hernani Espainia dela eta gaztelera hutsean egin behar dela uste ote dutelako? Baliteke!
Euskarak hernaniarren arteko elkarbizitza ez duela sustatzen iruditzen ote zaielako? Baliteke!
Denok gazteleraz badakigula eta euskararen beharrik ez dagoela uste ote dutelako? Baliteke!
Hernanin gaztelera arriskuan dagoela uste ote dutelako? Baliteke!
Euskal Herria Erdal Herria bihurtzeko gazteleraz egin behar dela uste ote dutelako? Baliteke!
Euskarak kontu txikiak aipatzeko balio duela, baina mezu garrantzitsuak gazteleraz zabaldu behar direla uste ote dutelako? Baliteke!
Erdarak erdaldun egiten gaituela uste ote dutelako? Baliteke!
Hernaniko euskal hiztunei begirunerik ez zaiela erakutsi behar uste ote dutelako? Baliteke!
Euskaltzaletasuna bost axola ote zaielako eta Hernanin mintzatu behar den hizkuntza bakarra gaztelera dela uste ote dutelako? Baliteke!
Euskarak historian zehar pairatu duen zapalkuntza berdin ote zaielako? Baliteke!
Galdera gehiegi ez ote direlakoan nago, baina agian galdera hauek guztiek erantzun bakarra merezi dute: Euskal Herrian Euskaraz!