Datorren igandean, Kontxako bandera erabakitzeko estropadetan, 11:30etatik aurrera giza katean egongo gara hondartzan Zubietako munstroa gelditzeko ahaleginean, Errausketaren Aurkako Mugimenduak eta beste talde politiko, sindikal eta gizarte mugimenduk deituta.
Aurten egoera berri baten aurrean aurkitzen gara: Zubietako erraustegiaren obrak hasiak dira. Hala ere gure borrokak aurrera darrai, ez dugu etsitzeko asmorik eta gertatzen dena gertatzen dela ere, hiri hondakinen errausketaren aurka jarraituko dugu. PNV, PSOE eta PPko politiko errausketazaleen eta inplikatuta dauden enpresen interesak salatzen jarraituko dugu eta modu guztietako oztopoak jartzen saiatuko gara.
Alternatiba hobea, garbiagoa eta merkeagoa badela esaten dugu eta gure herrian bertan gara horren lekuko, Hernanin urte asko baitaramagu hondakinak askoz hobeto kudeatzen Atez Ateko bilketarekin, organikoarekin konposta banaka edo taldeka eginez, eta abar. Horregatik, ez dugu onartu behar Zubietan eraiki nahi duten alferrikako erraustegi hori, osasunarentzako, ekonomiarentzako, Ama Lurrarentzako eta baita enpleguarentzako kaltegarria delako batetik, eta Gipuzkoako eta Europako hainbeste lekutan erakutsi dugunez alternatiba hobea badagoelako.
Igandean hernaniarrok ere deituta gaude Kontxako giza-katera, ozen esatera ez dugula onartuko erraustegi kriminal hori, ez gure etxe ondoan eta ez inon. Animo denok!
Kontxi Aldanondo Aranburu
Hernanin Zero Zabor