Gure amak esaten zuen. Bai, txikitatik gogoan daukat amak esaten ziguna herriko ekonomia sustatzeari buruz; zein garrantzitsua den herrian erosketak egitea, eta tokiko garapena bultzatzea. Eta ez zait sekula ahaztu. Jakina da egun, besteak beste, familia ereduek, etxebizitza konpartitzeko moduek, lana eta ordutegiek, azkartasun beharrak, edota nahia berehala asetzeko joerak, eragin handia izan dutela gure jokabidean; baita erosketak egiteko orduan ere.
Ordu txikietan, gosetuta, Nafar kaleko bendinean donuts bat erosi genuen. Eta jateko orduan, ohikoa den trantze momentuan, hura biltzen zuen plastikoko hizkiak irakurtzean sorpresa handia hartu nuen: «Esnal Gozotegia 1959-tik. Artisau produktuak harrizko labean eginak».
Zer pentsatu eman zidan hark. Pozik (baita harrituta ere, ez baita ohikoa), herriko denda bateko produktua jaten ari ginelako, eta noski, oso goxoa zegoelako. Baina hausnarketa eragin zidan honek: «zergatik bendingean? Eta zergatik harritzen naiz?».
Ez nator gauza berriak esatera, baina agian bai herri baten osasuna, ongizatea eta garapenerako oinarrizkoa den ideia bat gogora ekartzera: herriko dendek behar gaituzte guk haiek bezain beste. Herria bizirik mantentzeko beharrezkoa da tokiko merkataritza ere zaintzea eta kontuan hartzea erosketak egiteko orduan.