Biba Mintzalagunak!

Ezer gutxi eskatzen omen du eta asko eman. Probatu dutenek diote jendearen arteko ha­rremanak areagotzeko ezin hobea dela eta lehen ezinez­koak iruditzen zitzaizkien hainbat gauza egiten dituztela orain; euskaraz po­teatzea, kasu. Ezin hobea da, gainera, nork bere bu­ruaren­­gan konfiantza, soltura eta maila hobea eskuratzeko. Ez da harritzekoa probatu duten gehienek esatea orain gehiagotan egiten dutela lankideekin, lagunekin, baita merkatariekin ere.
Ekimenaren bueltan, Eus­kal Herrian 6000 pertsona elkartzen dira astero euskarari arnasa emateko. Ordu betez aritzen dira elkarrekin euskaraz hizketan. Hogeita lau urte daramatzate Min­tza­lagunek txingurri lan eten­gabe horretan, euskaraz praktikatzeko gogoz diren bi­delariak eta horretan lagun­tzen dieten bidelagunak. Er­leak eta loreak bezala, batak besteari emanez, inguruko guztioi on eginez. Herriz-herri egiten duten lanari esker, euskal hiztunak ugaritzen direlako, harreman sare berriak sortzen direlako eta euskaraz aritzeko gune berriak irabazi.
Bidelariak eta bidelagunak. Kontzienteki ala ez, euskararen aktibistak dira; gure hizkuntzaren erabilera in­dar­­tzen ari direnak. Talde bat elkartzen denero ematen delako euskaraz bizitzeko pauso bat.
Datorren asteburuan ospatuko dute Mintza Eguna Derion. Euskal Herri osoko Mintzalagunak elkartuko dira, festa giroan, euskaraz gozatzeko. Izan dadila Derio harremanak estutzeko hi­tzordu, urtean zehar egindako lana eta etorriko diren lorpenak ospatzeko jaia. Mintzalagunen jai handia! Bejondeizuela!