SOS Dendak

Maugi Rojo Gonzalez, Ikusi Makusi jostailu denda

Hernaniko dendek zu behar zaituzte!
Okindegia, kafetegia, arran­degia, jostailu denda, ta­berna, belar denda eta abar luze bat. Ba al dakizu zer dagoen zerrenda luze horren atzean? FAMILIAK. Herriko familiak, egungo egoeran bizirauten saiatzen direnak, egunez egun borrokan ari­tzen direnak komer­tzio txiki horien pertsianak irekitzen jarraitzeko.
Hernaniko dendak hiltzen ari dira, eta askok buruan darabilkigu pertsiana ixtea.
Krisia, azalera haundiko sa­ltokiak, aparkatzeko arazoak, internet eta bertako online denda haundiak... Bilatzen ditugun justifikazio guztiek izango dute arrazoi pixka bat, baina ezin dugu horretan ge­ra­tu. Ezin dute izan elkarriz­ke­ta hutsaletarako gai bat gehiago, euria ari duen edo bero egiten duen aipatzen du­gu­nean bezala; denok dugu zeregina, Hernani bezalako engranaje haundi batek fun­tzionatu dezan.
Amesteko eskubidea daukagu, eta bizitzeko nahi dugun herria eraikitzekoa.
Nik ez dut lotarako herri bat nahi, herri bizia nahi dut! Ez dut nahi emotikonoen bi­dez elkar agurtzen dutenek osa­tutako gizartea, aurrez au­rreko harremanak nahi ditut, kafe eta ko­pak eskuan, kaleko elkarrizketekin batean. Ez dut herri itzali bat nahi, kolorez betetako kaleak nahi ditut, eta argiztatutako erakusleihoak; nere seme-alabek eskolako paretetatik haratago herrian ha­rre­manak egitea nahi dut; senti dezatela herria beraiena ere badela, eta ezagutu ditzatela okindegian, arrandegian... eta Hernaniko familien ze­­rrenda haundi horretan.
Horregatik guztiagatik, eta herria denon artean egiten du­gu­lako, zure hondar alea jar de­zazun gonbidapena egiten dizugu, herriko dendetan erosiz.
Hernani bizirik nahi dugulako eta denok merezi dugulako.