Aurtengo hau izan daiteke, garai berri baten atariko Maiatzaren Lehena. Euskal Herrian eta gure mugetatik harago ematen ari diren gertakariek aukera berriak zabaltzen dituzte: Catalunyako prozesua, gurean armagabetze prozesua, euskal sindikatuen artean elkarlana berreskuratzeko hasi dugun bidea...
Estatus politikoak berritzeko ekimenak martxan diren honetan, Euskal Herrian burujabetza prozesua abiatzeko baldintzak egon, badaude. LABetik burujabetza aldarrikatzen dugu lan mundua aldatzeko eta egoera soziala iraultzeko; negoziazio kolektiborako euskal esparrua bermatzeko, euskal pentsio sistema propio baten alde, EH feminista eraikitzeko, lan munduan prekarietatearekin bukatzeko, 35 orduko lan astea eta 1.200 euroko gutxieneko soldata ziurtatzeko, gure osasuna eta bizitza arriskuan jarri gabe lan egiteko eskubidea izan dezagun, sektore publiko indartsu baten alde eta enplegu publikoaren defentsan edota euskaraz lan egiteko dugun eskubidea ziurtatzeko.
Iruzur egitea da burujabetza aldarrikatzea politika neoliberalak babesten diren bitartean. Iruzurra da hemen bide propioak aldarrikatzea eta aldi beran Moncloako sukaldean gobernuarekin 78ko iruzurra errepikatzeko asmotan aritzea. Iruzurra, industriaren eta enpleguaren aldeko diskurtsoa egitea, prekarietatean sakondu, zerbitzuak pribatizatu eta merkantilizatzen direnenan.
Honenbestez, dei egiten dizuegu aurtengo Maiatzaren Lehenean Bilboko kaleetan mobilizatzera. Ozen oihukatzera, langileok garai berri baten bila goazela, borrokaz aldaketa sozialak lortuko ditugula.