Eguberri egunetik abenduaren 26rako gauean, neska-mutilek hartua zirudien Hernaniko Kaxkoak. Arratsaldeko 19:00ak aldera, 16 eta 25 urte bitarteko gazteak, etengabe mugitzen ziren Kaxkotik, botelloiak egiteko beharrezko guztia zeukaten poltsekin. Plaza beteta zegoen.
Gaueko 22:00etan, botelloien arrastoak zeuden nonahi; Leokan, Portura doazen eskaileren ondoko zabalunean, Santo Cristo del Humilladeroko ermitan, Atetxikitasen, elizako atean, udaletxeko arkupeetan, Atzietasen Eltzekondo bizi zen etxearen ondotik hasita, Goiz Eguzkin eta ondoan, Kardaberaz parkeko bolatokiko zelaian...
Nik ez dut horrelako zerbait ikusi 2016 urte osoan, ezta txotx denboraldian ere. Eta esan didate, bizilagunek deitu zutela Udaltzaingora, eta erantzuna izan zela ez zeukatela baliabiderik, egoera kontrolatzeko. Horrelako egoeren aurrean, ezin badute kontrolatu, badago jokaera protokolo bat; kontua da, ez dutela martxan jarri nahi, eta horrekin, bizilagunak alde batera uzten dituzte, atsedenerako daukaten eskubidea galtzen dutelarik.
Udaletxearen harremana duten pertsona batzuekin hizketan, diote pasada bat izan zela, eta konponbide zaila daukala. Uste dut, berriketa merkea dela, bere burua justifikatu nahian.
Izan gaitezen serioak: arau zibikoak aplikatzeak dakar, beste helburu batzuen artean, zibikoak ez diren jarrera batzuk saihestea, eta aforoak kontrolatzeak laguntzen du horretan. Urteak daramazkigu kasurik egin gabe, eta hortik gure herriaren fama: denak balio duen araurik gabe hiria dauka ezizena Hernanik.
Eta nik diot: gaizki aparkatzen duenari zigorra jartzen bazaio, zergatik ez kalean zaborra botatzen duenari, kanpoan kontsumitzeko edariak saltzen dituenari, edo aforoak errespetatzen ez dituenari?
Alkatearen inbestidurako diskurtsoak, esperantza eman zigun hobera egiteko, baina Kaxkoko asteburuetako zalapartarekin, beste aldera begiratzen dute, eta gero justifikaezina dena justifikatu nahi dute. Mozkorkeriaren turismoa ez da nahi duguna. Zuen eskura dauzkazue ordenantzak, beraz egin ezazue egin beharrekoa, bizilagunen alde.