Pintada, txikizio eta abarren trataerari buruz

Badira gai bat eta gertaera ba­tzuk, gure herrian etengabe errepikatzen direnak: pintadak lurrean, fatxadetan, altzarietan... Horiek konpon­tzeak kostu bat dauka, kasu batzuetan Udalak ordaintzen duena, bildutako fondo ko­mu­netik, berez herriaren ongizate eta behar komunetarako dena; eta ez pertsona batzuen txikizioak konpon­tzeko, zein diren identifika­tzeko saiakerarik egin gabe. Ez badituzte bila­tzen, ez di­tuzte aurkituko, noski. Eta horrela, errepikatu egingo dute, eta baita harro sentitu ere; akaso, gudariago ere bai.
Gertaera horien aurrean, galdera asko sortzen zaizkit. Baina nik bakarrik erantzuten baditut, ez dugu aurrera egingo. Beraz, uste dut egokiena dela galdera horiek mahai gainean jartzea, bakoitzak hausnartu dezan, eta posizionatzen joan gaitezen:
-Desidia da edo ez da desi­dia, egileak zein diren ez iker­tzea, txikizio horien kostua ordaintzea exijitzeko? Udal­tzaingoa daukagu horretarako, eta baita Udala, alderdi des­berdinek osatzen dutena. Gizartearen aurrean dauzkaten betebeharrei erantzuteko jasotzen dute dirua. Hala bada benetan, nabaritu dadila.
-Azaroaren 4an, udaletxeko bilera batean, gaizki ulertu ez banuen, zinegotziak esan zuen orain arteko postura izan dela errudunak ez zigortzea. Zuze­na iruditzen zaizue txikizioak konpontzera mugatzea, errudunak bilatu eta ikertu gabe?
-Uste duzue horrela jokatuta, hobera egingo dugula eta arazoa konponduko dela?
-Nabaritu duzue azken urte­otan hobera egin dugula, jokabide horrekin, Txotx garaiko garbiketa, txikizio, pintada, zarata eta abarri dagokienez?
-Ez duzue uste, politikariek arazoari aurre egin eta eran­tzukizunak asumitu beharrean, gehiegitan babesten dituztela gaizkileak, herritarroi or­dainaraziz horren kostua?
-Gure herrian bada ordenantza bat, gai honen inguruko gure eskubide eta betebeharrak zehazten dituena, eta bai­ta udal korporazioarenak ere, betetzetik oso urrun dagoena.

*Nota: gomendatzen diet, he­rri­tar ona izan eta Udalaren jarduna baloratzeko gaitasuna eduki nahi duten guztiei, udaletxetik pasa eta Ordenantza Zibikoaren kopia bat eskatzea. 
 
Jesus Arregi Apaolaza