Herri baten kultura, animaliei ematen zaien tratuan ere, ikusten omen da. Izugarri poztu ninduen Gasteizen hiriko festetatik asto lasterketak kentzea erabaki zutenean, festa alternatiboaren aukera emanez. Hernanin oraindik asko falta zaigu horrelako sentsibilitatera iristeko. Hor dugu aurtengo programa: sokamuturra, pottokak eta zezen txikiak haurrentzat...
Portuko festak ere hor ditugu. Urtero asto lasterketak eta Gorriti bere animaliekin, basurde txikiak botatzen umeek harrapa ditzaten. Izugarria da ikuskizun hau! Eta galdeketaren bidez, ezin dugu hau konpondu, animalien eskubideak gainetik baitaude.
Baina zerbait mugitzen hasia da. Mila esker eta zorionak Askekintzari. Orain dela denbora gutxi, zuek egin duzuen protesta, ezinezkoa irudituko zitzaigun Hernanin. Datorren urtean gehiago izango gara!
Guk ondo pasatzeko, inoiz ez genuke animalirik erabili behar. Eta «gure festa dela» diotenei, adierazi nahi diet: esklaboak eta gladiadoreak ere izan zirela noizbait, baina XXI. mendean gaudela, enteratu ez badira ere.
Eta festei buruz Udal balorazioan, puntu garrantzitsua falta da. «Jai giroa, elkarbizitza eta errespetua izan dira nagusi», diote. Agian, balorazio horretan, bizilagunen iritzia falta da. Txosna eta barraketako inguruan bizi diren bizilagunena: Elkano, Ispizua, Tilos, Lizeaga, Larramendi, Oarso, Zahar Egoitza barne, eta abar. Galdeketa egin dezatela!
Txosnen ordutegia gehienetan ez dute errespetatu. Eta dezibelioak, zer esan? Udalak emandako baimenean ez baitzuen toperik jartzen. Horrek esan nahi du, nahi zuten potentzian jarri zezaketela musika, eta horrela izan da. Agian baimen hori ez zen oso legala, ikusi egin behar! Garbi dago, tope bat egon behar duela.
Agian, datorren urterako bizilagunen ordezkaritza batek parte hartu beharko luke, festetako programa osatzeko garaian, hauek denontzat izan daitezen, zenbait gauza kontutan hartzeko.