Tomas Arotzena Zubeldia, Hernaniko GEDren izenean
Hau ditxa geurea! Beste behin ere GED taldea herritarrok zoriontzera gatozkizue, izan ere, ekainaren 3an Ave Marian antolatu Herri Antzerkiari emaniko erantzunak honetara baikaramatza.
Erronka handi samarra jarri genion geure buruari antzezlana leku horretan burutu nahi izatearekin –ezin ahaztu eguraldiaren makurrak atzeratzera behartu gintuela- baina, hain da leku zoragarria! (gehiagotan probextu beharrekoa), ezen bertan antolatzea lehenetsi baikenuen. Eta ez gara, ez, inondik ere damutzen hartutako erabakiaz.
Bertaratu zineten herritar oro zoriontzeaz gain, giza legekoa izaki, aipamen berezia beharko genieke egin, eskaini diguten laguntzagatik, ondorengoei: Javier Zubimendi, Miren Gojenola, Mikel Laskurain eta Txaro Untzillari, baita –nola ez-Ahmer elkartea, Larre-Gain Sagardotegia, Udal langile, dantzari, musikari, teknikari eta bolondres orori ere.
Bihotz bihotzez esker anitz den-denoi!
Bai, hemendik aurrera ere izanen dugu elkarren berri eta datorkiguna kontuan izanik, oporrak eta abar, honatx, bada, geure aldetik opa dizueguna: “Uda sasoiaz disfrutatu, festaz blaitu!, kurtso berriari indarberrituz heltzeko, datorren udaberriko erronka nagusiari –herri kontsulta, alegia- ilusioz beterik lotu nahi eta beharko gatzaizkio eta”.