Berriro ere Hernaniko herritarroi eskerrak eman beharrean gaude, emandako lezioagatik: maiatzaren 29an, igande goiza sakrifikatuz, Onkologikotik Diputaziorainoko giza-katera azkenean 1.000 hernaniar inguru joan ginen “Errausketarik Ez! Osasuna bai!” aldarrikatzera.
Denetara 10.000 gipuzkoarretik gora egon ginen giza-katean eta mundu guztiak bukatu zuen pozik dena ondo atera zelako. Mila esker hernaniarroi Donostiako kaleetan erakutsitako indar eta heldutasunagatik. Mila esker antolatzaileen poltsan utzi zenuten diruagatik ere; ondo etorriko da errausketaren kontrako kanpainan egiten ari garen gastuetarako (etxeetan banatu diren orriak, kartelak, eta abar pagatzeko).
Sei urte daramatzagu hernaniarrok demostratzen hondakinak kudeatzeko badagoela erraustegia baino modu errez, merke eta garbiagoa. Ez gaituzte desanimatzen erraustegiaren propagandistek, ez gaituzte engainatzen “gauzak gaizki egitea berdin dio” esaten duten politikariek. Mila esker eta animo, Hernanin ondo ari gara!