Atez Atekoaren ontasunak Bilduren gertukoenek bakarrik sinesten dituzte. Legegintzaldiro zinegotzi bat iristen da, tokatzen zaiona hondakin bilketa sistema garesti, zikin eta deseroso hau defendatzea, eta itxiera sistemarekin lotzea (errausketa, birziklatu edo berrerabili ezin diren hondakinen aprobetxamendu energetiko sistema gisa).
Beste behin argitu beharra dago edozein bilketa sistemak (5garren kontenedorea, Atez Atekoa, Mixtoa...) sortzen duela errefus frakzio bat, eta beraz, hainbat parametro aztertu behar lirateke bata ala bestea ezarri erabakitzeko. Beste gauza bat da zer egin errefus frakzio horrekin (aprobetxamendu energetikoa, harrobietan fardelak...), eta horretarako, kontuan izan beharko dira beste parametro batzuk (legedia, kostua, aprobetxamendu energetikoa, bideragarritasuna, ingurumena...).
Hernanin badirudi Bilduko inork ez duela hausnartzen beste herrietan gertatutakoari buruz, hondakinak Atez Atekoarekin jasotzeak urtero eragiten duen milioikako gastuari buruz, edo urtero 2.336.635kg hondakin desagertzen jarraitzeari buruz. Azken datu hau kontuan hartuta, azkenean sortzen den guztiaren %54,4 bakarrik jasotzen da gaika. Eta okerrena da 2,3 tonelada horiek errefusaren frakzioara dijoaztela.
Nondik ateratzen dira datu hauek? Ondorengo datu publikoak konparatzetik: Gipuzkoan batez beste sortzen den urteko, pertsonako kilo kopurua (urteko, biztanleko 400,8kg), Hernaniko datuekin (urteko, biztanleko 281,6kg). Hondakin turismoarekin urtero desagertzen dira 2.336.635,2kg.
Errealitatea egoskorra da, eta Hernanin, 19.601 biztanlerekin, 5.519.527kg hondakin gutxiago jasotzen da Lasarten baino, non, 18.082 biztanlerekin, 6.450.295kg jasotzen diren. Urnietan, 6.198 biztanlerekin, 2.338.612kg jasotzen dira, Hernanin jasotzen denaren erdia baino gehiago. Ez al da arraroa?
EAJ-PNVtik uste dugu hitzaldi dogmatiko gutxiago eman behar direla, eta gehiago hausnartu.