Hitz soil batzuk Hernanin bizi ez den eta jatorri argirik ez duen sinadura daraman eskutitzari erantzuteko. Bitxia bada ere, gutun horretan, bere izena agertzeko balentria ez duen pertsona batek balizko mehatxu baten berri ematen digu: musulmanek haien kultura eta ohiturak inposatu nahi dizkigutela. Eta pertsona horren errezeta da musulmanei gure kultura eta ohiturak inposatzea.
Mehatxuka jarraitzen du: erakundeetatik politika hori bultzatzen ez badugu, igandeko hauteskundeetan ez digula bozkarik emango. Egia esan, sekula ez dugu bozka xenofoboa erakartzeko kanpainarik egin.
Argi daukagu pertsona guztiok dugula duintasunez bizitzeko eskubidea, edonon jaioak izanik. Eta guztioi bermatu behar zaizkigu eskubide, erantzukizun, betebehar eta aukera berberak, gure generoa, sinesmena, etnia, identitatea, sorlekua edo nazionalitatea edozein dela ere.
Elkarbizitza da gakoa; horretarako elkarren ezagutza eta ulertzea ahalbidetuko duten dinamikak eta jarduerak beharrezkoak ditugu. EH Bildu osatzen dugun kolektibo eta pertsonek uste dugu beste ohitura eta sinesmen batzuk dituztenekin harremana edukitzea ez doala, inolaz ere, gure herriaren identitatearen kontra. Aitzitik, gure adimena zabaldu eta praktika horrek eskatzen duen eskuzabaltasunak aberastu egiten gaitu, indartsuagoak egin –aliatu gehiago baikara– autonomia osoa lortzeko borrokaren erronkei aurre egiteko garaian, elkartasunezkoa, feminista, ekologista eta euskalduna den identitate baten mesedetan.