KIROLA ETA PARTE-HARTZE BATZORDEA
Egia esan mesfidati joan nintzen Batzordeko bilerara, ez nuen ulertzen, herritarren parte-hartze batzordearen bilera Astelehenean goizeko 9retan. Nire buruari galde egiten nion, ez ote da ordu egokiagorik herritarrak bertaratu ahal izateko?
Bilera hasi ala horrela itaundu (galdetu) nuen Batzordeko lehendakaria, neure buruari egiten nion galdera berberarekin. Erantzuna, lehenengo bilera zela eta aurrerantzean aztertuko zutela noiz eta nola egin herritarren parte-hartzea bermatze aldera. Bueno, ez da gutxi nire aburuz.
Bilera honetan guztiak gai garrantzitsuak baziren ere "gai izar" bat bagenuen, zabor bilketaren inguruko galdeketa. PNVkoek galdera zehatzarekin etorri ziren bilerara, batetik eta bestetik hori ez zela legezkoa adierazten zitzaien eta parte-hartze batzordera ezin dela inposaketarekin etorri. Orduan proposamen bat jarri zen mahai gainean, galdeketaren prozesua bideratzeko mahaia osatzea, alegia. Eztabaidatu zen, luze gainera, azkenean guztiak bat etorriz atzeratu egin zen galderaren bozketa (inposaketa) goian aipaturiko mahaia osatu bitartean. Niretzat behintzat PNVek egundoko urratsa eman du parte-hartze batzordearen sinesgarritasunaren alde eta parte hartze batzordea benetako parte-hartze batzordea izate aldera. Bide onetik goaz, guztiok. Horrela bada hurrengo bilerara ilusioz bertaratuko naiz.
Hara, bilera amaitu denetik 24 ordu ez dira pasa (idatzia asteartean bidalia da) eta DVko Astigarragako kronika irakurtzen dut, ba nengoen ba ni. PNV atzera egin nahian? Nork zapuztu nahi du bileran aho batez hartutako akordioa? Santosek, Ramonek eta Nereak beteko al dute bere hitza?
Benetan diot, batzordearen sinesgarritasunerako akordioak bete beharrekoak dira, edonor (esku beltzen bat) atzetik ez betetzearen alde badago ere.
Joxi Uranga Pereira