Uztailaren 15ean, irailean lehen aldiz Haurreskolan hasiko diren gurasoen bilera izan genuen. Bertan, gure haurrak egongo diren instalakuntzak, funtzionamendu arauak eta hezitzaileak ezagutu eta gure haurrak baldintza egokietan egongo diren lasaitasunarekin oporretara joango ginela uste genuen. Baina, horren ordez kezka handiarekin utzi gaituen ezustekoa jaso genuen.
Haurreskolan dagoen leku faltaren arazoa ez da berria eta horri behin betiko irtenbidea emateko aukera egon bitartean, behin behineko soluzio gisa, Udalak haurreskolaren parean dagoen lokala eskuratu du. Baina, lokal hori ez da prest egongo irailerako, baizik eta goizenen, azarorako. Hori horrela izanda, Partzuergoak irailean hasteko izena emandako haur guztiak onartu ditu, eta beraz, guztira 45 haurrek hasiko dute ikasturtea, jakinda, egungo lokalaren tamaina eta gelen banaketak ez dituela aukera egokiak eskaintzen eskaera honi erantzuteko. Gauzak horrela, lokal berria martxan egon bitartean gure seme-alabak oso estu egongo dira egungo lokalean.
Ez dakigu, Partzuergoa, Udala eta Haurreskolaren arteko komunikazio edo koordinazio faltaren ondorioz aurkitu garen egoera honetan, baina, egoera salatzeaz haratago aukera aprobetxatu nahi dugu Astigarragan gure haurren hezkuntza zerbitzua hobetzeko dituzten erronken aurrean ardura duten instituzioei erantzunkizunez jokatu dezaten eskatzeko.