Luis Intxauspe Hernaniko alkatearen aurreneko hitzetan, erabateko aldaketa nabaritu genuen, duela lau urte eman zuen hitzaldiarekin konparatuz. Bilduko alkateak hainbatetan aipatu gintuen plenoa osatzen dugun 17 zinegotziak, elkarrekin lan egingo dugula esan zuen, eta talde politiko guztiekin bilerak hasiko zituela, puntu komunak bilatzeko. Badirudi Hernaniko Bilduk politika egiteko modu berri bat hasi nahi duela, eta EAJ-PNVko zinegotziek ongietorria ematen diogu.
Udal Korporazio osoaren argazkia eta ondorengo brindisa, zinegotzi guztiok elkarrekin, berria da Hernanin. Oposizioko zinegotziek modu normalean egin genuen aurreko legegintzaldian, baina Bilduk ez zuen beharrezkoa ikusten. Keinu honek beste pausotxo bat irudikatzen du, EAJ-PNVtik lau urtetan eskatu dugun normaltasunera iristeko. Lehiakide politikoak gara, baina ez etsai politikoak, eta are gutxiago etsai pertsonalak.
Batzuek esaten didate inuxentea naizela, baina uste dut konfiantza eman behar zaiola onerako aldatu nahi duenari, eta horretan ari gara.
Alkateak aipatu zuen, baita ere, ez erabiltzeko hainbeste komunikabideak, baina EAJ-PNVn uste dugu, udaletxean lan egin ondoren, hernaniarrek jakin behar dutela gure talde politikoak zein iritzi duen, Gobernu Taldeak hartutako erabakiei buruz. Gardentasunean sinesten dugu erabat.
Espero eta desio dugu, etapa berri bat hastea gure udalerrian, eta onuragarria izatea hernaniar guztiontzat, eta Hernaniko enpresa eta profesional guztientzat.
Gora Hernani eta gora San Juan!