Udaberriko landareen loratzearekin batera, Amherrek, Hernaniko Elkarte Multikulturalak, urteroko zita dauka gaur hernaniarrekin: jaialdi gastronomikoa. Janari zaleek, eguerdiko 12:00etatik 14:00etara dute zita, hemezortzi herrialde ezberdinetako platerak probatzeko. Janari postuak Plaza Berrin jarriko dira; euria egiten badu, Atsegindegin.
2004an antolatu zuten aurreneko aldiz, eta aurtengoa, hamargarren edizioa da; 2005ean ez zen antolatu. Ordutik, elkarteko kideek diotenez, Amherren helburua berbera da: «Festa gastronomikoa autoktonoak eta etorkinak elkar ezagutzeko lekua da. Herritarrei erakutsi nahi diegu hemengo lehengai berdinekin, etorkinek platerak beste modu batera nola prestatzen dituzten».
Mokadutxo eta tragoxka bat egiteko txartelak Plaza Berrin jarriko dituzte salgai, hiru euroren truke.
Aurtengo festa gastronomikorako bi fitxaje berri egin dituzte: Gambia eta Urugay. Iaz kale egin zuten peruarrak ere bueltan dira gaurkoan. Eta noski, baita azken urteetan parte hartu duten hamabost herrialdeak ere, horien artean Argentina, Bolivia, Errumania, Maroko, Senegal eta Sahara, besteak beste. Bertako janaria nahiago dutenentzat ere, izango da aukera. 2013ko edizioaz geroztik euskal janak ere, bai baitu txokoa. Hala ere, aurreko urtetako joera ikusita, antolatzaileek diotenez «janari exotiko eta bitxiek arrakasta haundia izaten dute, herritar gehienak probatzeko gogoarekin gerturatzen baitara».
Bi pintxo eta edari bat
2004ko azaroan egin zen lehenengo esperientzia harek festa honen beharra berretsi zuen, eta baita etorkizunera begira egin behar ziren bi aldaketa nagusiak azaleratu ere: bata, jaialdia udaberrian, eguraldi onarekin, egitea; eta, bestea, ordainketa sistema ezartzea.
Bigarren ediziotik aurrera, Amherrek txartelak egin zituen kobratzeko sistema gisa. Hala, pintxoak eta edaria hartu ahal izateko, dagokion txartela erosi behar da Plaza Berrin bertan, aldez aurretik; hiru euroan salduko dituzte.
«Festa gastronomikoa autoktono eta etorkinak elkar ezagutzeko lekua da»
Musika, zuzenean
Janaria ez da gaurko protagonista bakarra izango. Festa-giroa borobiltzeko asmoz, musika zuzenean joko du talde berri batek. Amherren inguruan lehen pausuak ematen ari den perkusio taldea da, musikari marokoar, senegaldar eta sahararrez osatua. Amherren aurtengo erronketako bat da talde honen sendotzea eta Hernaniko beste neska eta mutil batzuk taldean sartzea: «asmoa txalaparta ere integratzea da, horregatik, hemengo musikariei deia egiten diegu talde honetan parte har dezaten».
Haurrentzat, sukaldaritza tailerra
Jaialdi gastronomikoa hasi aurretik, haurrek bereganatuko dute protagonismo osoa. Joan den urtean izan zuen arrakasta ikusita, 8 eta 14 urte bitarteko haurrentzat sukaldaritza tailerra antolatu du Amherrek. Tailerra Santa Barbara Elkartean egingo da 10:00etatik aurrera, eta bertaratzen diren neska-mutilek artoa lehengai duten hiru jaki prestatuko dituzte: euskal taloak, Kolonbia eta Venezuelako arepak eta Honduras eta Nikaraguako tortillak.
Ekintza ugari, integrazioaren alde
Festa gastronomikoa Amherrek urtean zehar antolatzen duen ekintza nagusietatik aurrenekoa da, baina ez bakarra. Horren ondoren datoz San Joanetako bertsolarien topaketa eta aerorumba saioak; urrian egiten den Aste Kulturala; edota immigrazioari buruz azaroan antolatzen den zinema zikloa.
Dena den, elkarteak lan garrantzitsuena etorkinekin pertsonalki egiten du, aholkularitza eta integraziorako orientatze lanetan. 2013 urtean zehar, adibidez, 500 bat kontsulta atenditu zituzten; eta aholku eske hurbildu zirenen artean, gehiengoa Honduras, Nikaragua eta Marokokoak ziren.
Azken finean, Amherrek gizarteratze lana hartzen du bere gain: «etorkinen integrazioa eta finkatzea errazten saiatzen gara, egunen batean etorkinek esan dezaten: ‘ni beste leku batean jaio nintzen, baina hemen bizitzea erabaki dut’». Horretarako, mendi irteerak, bazkari bereziak, gaztelera edota euskerazko klaseak, etab. antolatzen dituzte: «Ingurua ezagutuz hasten da bat bizitzeko aukeratu duen lekua maitatzen», dio elkarteko kide batek.
Datorren igandean, bazkaria
Ekimen bat bukatu gabe, hurrengoa jada antolatuta dute Amherreko kideek: hitzordu gastronomikoa hau ere; datorren igandean, maiatzak 18, izango da. Errioguarda-Enea Jatetxearen laguntzaz, ‘zapore mundiala duen menua’ prestatu dute Amerika, Asia, Afrika eta Europako platerez osatua. Hernaniarrei gonbidapena luzatu diete , bazkarira gerturatu, eta Amherreko kideekin batera bazkari multikulturalaz gozatzeko. Menuaren prezioa 30 eurokoa izango da eta maiatzaren 12a baino lehen eman behar da izena. Informazio gehiagorako: amher-sos_ racismo@hotmail.com.