Hamahiru txapela ofizial jantzi eta makina bat final jokatuta, ohituta dago Aimar Olaizola, zita haundien zurrunbilora. Horregatik, «betiko gauzak» egin eta beste edozein partidu bezala hartzen du igandeko finala. Galduta ere, pozik egonen litzateke, egindako lanarekin. Baina behin finalera iritsita, argi dauka txapelaren bila joan beharra dagoela: «Nik erasokor jokatuko dut, eta ahal dudan guztian Andoniri laguntzen saiatu».
Nola joan da finaleko astea?
Ongi, beti bezala. Uste dut bat ohitu ere egiten dela pixka bat. Beraz, betiko martxan. Txapelketa luzea izan da, lanak eginda daude, eta orain finalean zentratzea tokatzen da.
Zer egitea duzu gustoko, finalaren aurreko egunetan?
Betikoa, beste edozein partidutan bezala. Guztiak berdintsuak izaten dira niretzat. Finaletan, normala denez, zerbait berezia sentitzen dut, baina betiko gauzetan aritzen naiz: andrea eta semearekin egon, txakurrekin mendian paseatu...
Txakurrek ez dizute aholku askorik emango...
Aholkurik ez, baina haiekin paseatzeak deskonektatzeko balio dit, eta zentzu horretan, mesede egiten dit. Eta semearekin ere berdin. Garbi dago, semea pilota baino garrantzitsuagoa dela, eta harekin oso gustura egoten naiz. Hori bai, frontoira beti eramaten dut, baina momentuz ez du ezer esaten.
Hondarribian bizi zara orain. Ez al duzu jaioterria faltan botatzen?
Bai, eta ahal dudanean behintzat joaten naiz. Nire herria Goizueta da, hango jendearekin tratu asko daukat, lagunak bertakoak... Eta nire bizitza, gehienbat, Goizuetako jendearekin egiten dut, nahi baino gutxiagotan joan arren. Goizuetakoa izateaz oso harro nago.
Urte asko dira goi-mailan zarela, eta batzuk diote, ardoa bezala adinarekin mejoran zoazela. Zein Aimar da hobea: lehengoa edo oraingoa?
Uste dut lehengo berdina dela Aimar. Aldatu den bakarra burua, beharbada. Buruak lan asko egiten du, eta azken urteotan konfiantza gehiagorekin nabil. Belauneko lesioa izan nuenetik, hiru urte eta erditan, zortea izan dut, eta finalak jokatu eta txapelak irabazteko aukera ere bai.
Palmares luzea duzu, baina akaso binakako txapelaren bat gehiago behar zuen hor?
Nik horixe daukat pena. Txapelketa batzuetan, txapela irabazteko moduan jokatu dut, baina lortu ez. Dena den, binakakoan bikote bezala aritu behar da ongi. Gauza bategatik edo besteagatik, orain arte bi txapela lortzeko aukera izan dut, gehiago ez, baina ea aurrerantzean besterik irabazterik badudan.
«Hondarribian bizi arren, Goizuetako jendearekin egiten dut bizitza gehien. Oso harro nago goizuetarra izateaz»
Igandean bertan, hirugarrena lortzeko aukera. Eta berriro Irujoren aurka...
Hemen garrantzitsuena da norbera finalean egotea. Hortik aurrera, Irujoren kontra izan edo beste edozeinen kontra, niri berdin zait. Inporta zaidana da ni hor egotea, eta final honetan hortxe nago.
Nola jokatu behar zaio Irujori?
Ahal den bezala. Hori aurretik jakitea zaila da, ez dakit erasokor edo kontserbadore aterako den. Normalean erasokor jokatzen du, baina ikusiko dugu igandean.
Eta Aimar nola ikusiko dugu, erasokor ala kontserbadore?
Nik neureari helduko diot, erasokor jokatuko dut. Tantoak bukatzen saiatu, aukerarik dudanean, eta bestela Andoniri laguntzen ahalegindu.
Aretxabaletak maila polita eman du orain artean. Pixatuko dio lehen finala izateak?
Ez dut uste, eta espero dut ezetz. Oso mutil lasaia da, eta berarekin entrenatzen, lasai ikusi dut. Baina finalak beste kontu bat dira, eta Andonik bezala, gutako edonork egin dezake kale. Nahiz eta txapelketa ona egiten aritu, egun txarra izan dezakezu finalean.
Zure esperientziarekin, zertan laguntzen diozu?
Ahal dudan guztian. Pilotari gaztea izanik eta bere lehenengo txapelketan, bera lasaitzen saiatzen naiz lehenik. Gero, partiduan bertan, pilota txarrak kendu, sake gaiztoak... Eta pilota onak utzi, atzelari batentzat inportantea baita.
Nolako finala espero duzu?
Zaila, kriston bikotea dugu aurrean. Abel oso momentu onean dabil, eta Irujo beti bezala. Oso zaila izanen da, eta dena ongi eginda ere, asko kostako zaigu.
Beste txapela bat ekarri beharko duzu Goizuetara...
Hala nahi, baina... Gustatuko litzaidake txapela janztea, baina bestela ere oso gustura izanen naiz, egindako lanarekin. Ez genuen espero finalera iritsiko ginenik, eta oso lan ona egin dugu. Baina behin finalera iritsita, noski, txapelaren bila joan beharra dago.
Joka dezagun finaleko azken tantoa: 21-21 markagailuan eta sakea zuk. Nola planteatzen duzu tantoa?
Garbi dago 21-21 jarriz gero, beti izaten dela beste koskilleo bat. Baina beste edozein bezala planteatzen duzu. Sakea izanda, ahal den hobekien atera, eta ondoren, posible bada, aurrean tantoa bukatu.
Jarri titular bat partiduaren kronikari.
Aimar eta Andoni txapeldun, horixe litzateke guretzat kronikarik politena.