Erremonteko final haundia jokatuko da gaur, IV. Sagardoaren Txapelketako finala. Galarretan, bi sagardotegi izango dira elkarren kontra: Bereziartua eta Gurutzeta. Indarrak neurtuko dituztenak, ordea, erremontistak izango dira. Bereziartuaren izenean ariko dira Etxeberria IV eta Ion, eta Gurutzeta ordezkatuz Matxin III eta Etxeberria III. Galarretan izango da, 16:00etatik aurrera.
Hasiera batean, apirilaren 19an jokatzekoa zen finala. Baina Etxeberria III-ak sorbaldeko arazoekin amaitu zuen semifinala, eta astebete atzeratu zuten. Gaur, beraz, sasoi betean izango dira lau protagonistak, onena emateko prest. Eta eman beharko dute, txapeldun izan nahi badute.
Finalera, antzeko ibilbidea
Final haundira iristeko, ibilbide berdintsua izan dute bi bikoteek. Ligaxkan, talde desberdinetan aritu ziren: Etxeberria IV eta Ion A multzoan, eta Matxin III eta Etxeberria III B multzoan. Arerio gogorragoak topatu zituzten ligaxkan, eta azken jardunaldian lortu zuten, biek, finalerdietarako txartela, partidu erabakigarria irabazita.
A multzoan, Uterga eta Olazar (Saizar) izan ziren nagusi, ligaxkako hiru partiduak irabazita. Etxeberria IV eta Ionek, bigarren postua jokatu zuten Ezkurra eta Endikaren (Larre-Gain) aurka. Eta baita lortu ere. Partidua eta semifinaletako lekua, biak eskuratu zituzten.
Berdintsu aritu dira Matxin III eta Etxeberria III. Juaristi eta Agirrezabala (Petritegi) nabarmendu ziren B multzoan, partidarik galdu gabe, eta Gurutzetaren ordezkariak sailkatu ziren bigarren.
Semifinaletan, iraulia
Semifinaletan, ordea, hautsi egin zituzten pronostikoak, bi bikoteek. Bigarren postuan sailkatuta, beste multzoko liderrak izan zituzten aurrez aurre, partidurik galdu gabeak. Eta orduantxe galduarazi zieten lehena. Bereziartuak nagusitasunez irabazi zion Petritegiri (40-27), eta Gurutzeta gailendu zitzaion Saizarri (40-33).
Bereziartuak eta Gurutzetak, Petritegi eta Saizar kanporatu zituzten semifinaletan, ligaxkan nagusi izan zirenak. Beraz, unerik onenean iritsiko dira finalera.
Ligaxkako bikote onenak kanporatuta, unerik onenean iritsi dira finalera. Ostegunean aukeratu zituzten pelotak, eta laurak ziren gustora. Pelota biziagoak hartu zituen Bereziartuak, eta motelagoak Gurutzetak. Ez dira aitzakia izango, beraz. Gakoa beste nonbait egongo da. “Partiduaren hasiera izango da klabea”, dio Etxeberria III-ak.
Etxeberria IV-ak lehen finala
Etxeberria IV eta Ionek, azpeitiarrak biak, bikote beteranoagoa izango dute aurkari. Aurrelariak lehenengo finala du gaurkoa, baina Ion bikotekideak ez du uste nabarituko duenik esperientzia falta: “Aritz konfiatuta dago, eta final ona egingo du, ziur”.
Aurkariek ere, garrantzia kentzen diote horri. “Txispa askorekin ari da jokatzen, eta lana emango digu”, dio Matxin III-ak. Etxeberria III izango da Kontrapuntua: “40 urterekin, kirol-ibilbidearen beherakadan, sari bat da niretzat, final bat jokatzea”.
Beste hiru partidu, gaur
Gaurko bigarren partidua izango da finala. Aurretik, Ezkurra II-Larrañaga eta Segurola-Saldias ariko dira. Finalaren ondoren, berriz, Urriza- Endika eta Juaristi-Barrenetxea IV-ak jokatuko dute hirugarren partidua, eta Juanenea-Aizpuru III eta Matxin VI-Zubirik emango diote amaiera jaialdiari.