Laugarrenez ospatuko da, aurten, Ereñotzuko mendi lasterketa. Ekainaren 1ean izango da, normalean baino astebete lehenago, Gure Esku Dago dinamikaren Giza Katearekin ez kointziditzeko. Helburua, berbera izango da: herritarrentzako lasterketa bat antolatzea. Iazko ibilbide bera izango du, 12 km-koa.
Edizio honetan, gainera, umeek ere izango dute lasterketaz gozatzeko aukera. Orain arte, bide bazterretan egoten ziren, lasterkariei animoak ematen. Horregatik, eurak ere protagonista bilakatzea erabaki dute antolatzaileek. Dortsal bana jantzi, eta ibilbide labur bat egingo dute, Ereñotzuko kalean bertan.
Lehenengo umeak, gero helduak
Goizeko 10:00etan ekingo diote umeek, eta ordu erdi beranduago hasiko da helduen lasterketa. Iazko ibilbide bera izango du probak, 12 kilometrokoa, Usoko errekari buelta emango diona. Gainera, Usoko erreka bera pasako dute aurten, 2013koan ezin izan baitzuten prestatutako ibilbidea bere horretan osatu, eguraldiaren kulpaz. Euri jasa handiak izan ziren, eta ezin izan zuten Usoko erreka gurutzatu.
Urdaburu tontorrera
Antolatzaileek espero dute eguraldia lagun izatea edizio honetan. Horrela, prestatutako ibilbide politaz gozatzeko aukera izango dute parte hartzaileek. Lasterketaren aurreneko bi urteetan Oindi mendirantz egin eta gero, ibilbidea aldatzea erabaki zuten iaz.
Teknikoagoa da ibilbidea, jaitsiera zailagoekin. Hala ere, edozeinek egiteko modukoa da, lasterketa herrikoia izatea baita antolatzaileen helburua. Herritarrek behar dute protagonista. Edonola ere, asko estimatzen dute Jokin Lizeaga bezalako espezialistek parte hartzea. Ospatu diren hiru edizioak irabazi ditu urnietarrak.
Korrikalariek ere pozik hartu zuten ibilbidearen aldaketa. Paisaia politagoak ikusi eta txoko ederretan barrena lasterkan aritzeko aukera izatea eskertzen dute.
Aiako Harria parke naturalean zehar ibiliko dira lasterkariak. Atera eta berehala, Txilibita baserritik gora egingo dute, Sagasti lepo trikuharriraino iritsi arte. Hortik aurrera, tontorrez tontor joango dira, gora eta behera, Urdaburuko tontorreraino. Bertatik helmugara, dena aldapa behera izango dute, Usoko erreka gurutzatu eta Latseko fabrikaren ondotik pasata, Ereñotzuko plazara arte.
Oindikoa baino teknikoagoa da ibilbidea, baina hala ere, edozeinek egiteko modukoa, lasterketa herrikoia izatea baita antolatzaileen helburua.
Lehenbailehen apuntatzeko gomendatu dute
Izena emateko, bi bide jarriko dituzte herritarren eskura: Ibai Mendi dendan, eta kirolprobak.com webgunean. Ibai Mendin, gaur bertan ireki dute inskribitzeko epea. Internet bidez egiteko aukera, berriz, apirilaren 12an jarriko da martxan.
Prezioak bere horretan mantenduko dira. 10 euro, lasterketa aurretik, eta dortsalik geratuko balitz, 13 euro egunean bertan. Normalean, lasterketa eguna baino askoz lehenago bukatu ohi dira.
Plazak mugatuak dira: 200 plaza. Horregatik, antolatzaileek dei egin dute, lehenbailehen inskribitzeko.
Hernaniarrek parte hartzea nahi dute antolatzaileek, eta horregatik, dortsalen laurden bat, 50 hain justu, gordeta daude Ibai Mendin izena ematen dutenentzat. Gainerako 150ak internet bidez.
Urtero bezala, parte hartzaile guztiek opari bana izango dute: korrika egiteko txaleko teknikoa. Horrez gain, zozketa ugari izan ohi dira lasterketaren ostean, laguntzaileen ekarpenez: txuletak, sagardo botilak, kirol arropa, motxilak...