Xabi (gitarra), Iker (teklatua), Naroa (ahotsa eta perkusioa), Maider (akordeoia), Aitor (biolina eta txalaparta), Jon (perkusioa, txalaparta eta bibrofonoa) eta Ixiarrek (ahotsa, txalaparta eta perkusioa) osatzen dute Zugazti musika talde berria. Hala ere, «talde-taldea» ez direla diote: «batez ere lagun taldea gara, betidanik ezagutzen gara».
Ofizialki taldea ez direla esaten duten arren, esperientzia badute, Ttarlaren Zura emanaldia ez baita dantza talde batekin egiten duten lehenengoa izango. Duela bi urte Urnietako Egape Ikastolako dantzariekin Lanbro artean ikuskizuneko musikariak izan ziren. Aurreko esperientziak irakatsita, badakite dantza emanaldiak musikatzea berezia bezain arriskutsua dela, «musika eta dantzarien arteko elkarlana» gertatzea garrantzitsua baita. Zailtasun horrek, ordea, ez dirudi taldearengan presiorik gehitu duenik, urtarrila bukaera arte ez baitira entsaiatzen hasi: «azaroan pixka bat urruti ikusten genuen emanaldia. Urtarriletik aurrera, ordea, topera hasi ginen, astebururo entsaiatzen eta inauterietako asteburuan bakarrik deskantsatu genuen». Taldekide bakoitzak bere eginbeharrak dituenez, ez da erraza izaten elkartzeko ordu fijo bat bilatzea: «askotan ordu arraroetan entsaiatu behar izaten dugu».
Etorkizunari begira, Zugazti taldearen bilakaera zein izango den jakitea zaila da, baina argi dutena da, apirilak 5eko emanaldia ahaztezina izango dela: «esperientzia polita da gure bizitzarako, gainera Hernanin da eta hernaniarrak izanda, oso emozionantea izango da».