Azkeneko entsaioetan murgildurik, urduritasun eta ilusio tantak nabari dira Ttarla dantza taldeko hogeita hamar nesken aurpegietan. Datorren larunbatean estreinatuko den Zura emanaldiko protagonistak dira. 14 eta 25 urte bitarte dituzte, eta gehienak, Ttarlako helduen taldeko kide ere badira: «Ttarlako haurren irakasleak gara, batez ere; aurten ordea, gazteagoak direnak ere sartu ditugu, taldea sendotze aldera».
Dantzen bilduma
Zura ez da antzerki bat, Ttarlaren ikuskizun berria da, dantzen bilduma; baina, batez ere, euskal dantzaren gorespena da. Izan ere, Ttarlak emanaldian eskainiko dituen hamabost dantzen artean, oreka berdina izango dute dantza tradizionalek eta asmatutako koreografiek. Dantza tradizionaletako asko, berriak izango dira publikoarentzat. Eta asmatutako koreografietatik hiru, «Ttarlako dantzarientzat espreski eginak dira».
Asmatutako koreografia horiek «toke pertsonala» dutela azaldu dute Ttarlako dantzariek, beti ere, tradizionalak edo gipuzkoarrak diren pausuak oinarri hartuta: «koreografiak pausu tradizionalekin egiteak nahikoa lan ekartzen du, beste estiloak jorratzen hasteko moduan egoteko».
Makila, protagonista
Emanaldiaren muina dantzen bilduma izaki, eta ikusita makilak dezente erabiltzen zituztela, konturatu ziren, eta ikuskizunaren izena hortik joan zitekeela: «zenbait izen proposatu ziren: makila, egurra, ezpala, zura... eta Zura izen deigarria iruditu zitzaigun. Ez dauka istoriorik, emanaldia apaindu nahi genuen, besterik gabe». Gainera, Ttarla dantza taldetik haratago joan nahi zuten, eta emanaldia berari izen propioa eman: «izen bat izateak pertsonalizatu egiten du».
Musikak jarraipena, dantzari
Makila dantzetako askok komunean duten elementua bada ere, benetazko jarraipena musikak egiten du. Funtzio hori da, hain zuzen, Zugazti musika talde hernaniarraren esku dagoena. Bi taldeen arteko elkarlana duela hilabete batzuk hasi zen: «lehen, Billabonako musika talde bat etortzen zen Ttarlaren emanaldietara. Gure nahia ordea, Hernaniko musikariekin egitea zen, «Billabonakoekin genuen harremana bukatu eta Hernanikoekin bidea egin nahi genuen, jarraipena izatea».
Lan horretan zebiltzala, Urnietako Egape Ikastolako dantza taldeak Hernanin eskainitako Lanbro artean ikuskizunaz gogoratu ziren: «Zugaztiko musikariek Egapeko dantzariekin jo zuten, eta aukera ona iruditu zitzaigun. Gurekin aritzea proposatu genien eta baiezkoa eman ziguten. Zugazti musika taldearentzat ere aukera ona izan zen, momentu horretan proiektu baten bila zebiltzan eta».
Emanaldiko musikari dagokionean, Zugazti talde hernaniarrak dio: «erritmoak tradizionalak dira, baina doinuak ez». Zugastiko kideen ustez, euskal dantzetan tradizionalki erabiltzen diren instrumentuak alde batera uzteak lortzen du, dantzaldia modernizatzea edo kontenporanizatzea. Estilo desberdina emateaz gain, musikak ere ikuskizuna nolabait egituratzen duela diote taldekideek: «musika oso suabe hasten da, oso delikatu, eta azken kantak kañeroagoak dira».
Janzkerari ere duen garrantzia eman diote Ttarlako dantzariek hasieratik; bidea ez da uste bezain erraza izan: «arazoa da hogeita hamar garela eta dantza batetik bestera ez digula denborarik ematen aldatzeko. Arropa gutxi jantzi eta dantza bakoitzean diferente joaten saiatzen gara, fusioak egiten».
Hilabeteak, emanaldia ‘zuratzen’
Zura emanaldi «landua» dela diote Ttarlako kideek. Uda bukaeran planteatu zuten helduekin zerbait berezia egiteko nahi hori, dantza taldeko haurrekin urte amaierako egiten duten emanaldiaren gisara. Ordutik lanean dihardute: «hasierako burutazio batzuk baztertu eta, gaur Zura dena diseinatzeari ekin genion».
Indar guztia entsaioetan kanalizatu dute, ikasturte hasieratik. Horrek dakarren lan karga ere, nabaritu dute eta askotan, bestelako txikikeriekin presio hori arintzen ere, saiatu direla diote: «trajea bost milimetro handiagoa ala txikiagoa den, ilea nola eramango dugun edo eszenarioa nola izango den pentsatzen bukatzen dugu».
Larunbatean, ginda
Dena prest izanda, datorren larunbateko 22:00ak izatea besterik ez dute buruan. Kiroldegiko frontoian jarriko duten oholtzara igo eta Hernani dantzekin konkistatzea dute helburu. «Egun horretan hilabete hauetan egindako lana borobilduko dugu» diote Zugaztiko musikariek eta Ttarlako kideek.
«Haurrentzat erreferentzia izan nahi dugu»
Helduen dantza taldea duela bi urte jaio zen, zenbait barne-aldaketen ondorioz.
Orain pare bat urte gertatutako aldaketen emaitza da Zura, Ttarlako helduen emanaldi berria. Orduan, Ttarlako irakasleek bi behar zituztela somatu zuten: bata, haurren irakasleen formakuntzan aurreratzea, eta bestea, helduen taldearen sorrera. Hortaz, Billabonako Oinkari dantza taldearekin jarri ziren kontaktuan eta, ordutik, haiek dira Ttarlako helduen irakasle. «Haurrei erakusteko gutxiengo maila bat lortzeaz gain, haurrentzat erreferentzia izan nahi dugu eta, horrela, haiek dantzan jarraitzea eta helduon taldea mantentzea» diote Ttarlako kideek.
Egoera berri honetan eta Billabonako dantza taldearen eskema jarraituz, ikasturtean zehar ikasitakoa urte amaierako emanaldi batean erakustea erabaki zuten. Azken bi urteotan gurasoen aurrean egin da ikuskizun hori, baina, aurten, zerbait berezia egin nahi izan dute «herrira iristeko» helburuarekin.
Bide honen ondorioa da Zura, Ttarlako helduen taldeak aurkeztuko duen emanaldia. «Herriak orain ikusiko du zer egiten dugun eta nola eboluzionatu dugun», diote pozik dantzariek.