Desberdinak garenak ere existitzen gara

Harrituta geratu naiz Bildu­ren prentsa oharra irakur­tzean. Dirudienez, uholdeek eragiten dituzten kalteak gutxitzeko nik proposatutako “konponbide” posibleei eran­tzuten die. Hernanirako lanean 12 urte daramatzadanez, hernaniarrek erabaki duten zinegotzi gisa, berriz esaten dut Udal batek esparru askotan egin dezakeela lan, eta horietako bat da beste instituzioekin adostasunak lortzea herriaren bizimodua baldintzatzen duten edozein arazoren inguruan. Hernaniko Gobernu Taldeak ulertu izan balu ibaia draga­tzea zela “konponbidea” uholdeen kalteak gutxi­tzeko, Uraren Euskal Agen­tziarekin (URA) lan egitea besterik ez zuen. Dirudienez, desberdinekin adostasunak lortzea ezinezkoa da Bildu­rentzat.

Errugbi eta futbol zelaiak harrobira igotzea ez dudala proposatu dioenak, harrobia betetzeko epe arazoak tarteko, erakusten dit ez diola entzuten zinegotzi honi edo, besterik gabe, gezurra esaten du sinatzen duen artikuluan.

Azkenik, esan nahi diot Bilduren Gobernu Taldeari, oposizioak bere ikuspegia eman behar duela gobernuaren ekintzen gainean (iritzia eman-kritikatu) eta herriko arazoen aurrean konponbideak proposatu. Desberdina denari, iritzia ematen uztea, entzutea eta errespetatzea demokraziaren oinarriak dira.
Hernanirako lanean 12 urtez aritu ostean, horietatik 8 oposizioan, ikasi dut Bildu ez dagoela ohituta besteek aurpegira esatea ondo egiten ez dutena.
Nik jarraituko dut entzuten, iritzia ematen, ekarpenak egiten eta adostasunak lortzen. Demokrata izaten jarraituko dut, besteek jakingo dute demokraziarako bidean aurrera egiten jarrai­tzen duten edo dauden lekuan geratzen diren.

Geroz eta gutxiago gera­tzen da, denon artean lortzeko, Hernanin kaosa konpon­tzea eta desgobernua.