Martxoak 8

Hernanin urteak daramatzagu herri parekideago eta justuago baten alde lanean, bai udaletik baita herriko mugimendu feministatik ere. Azken urteetan aurrerapauso nabarmenak eman dira Hernanin tratu onen alde, eta baita emakumeen ahalduntzea eta kontzientzia feministari dagokionez ere. Eraso sexisten aurrean, erantzun sendoa eman izan du gure herriak, emakumeenganako eraso oro gaitzetsiz.    
Oraindik ere emakumeak bigarren mailako herritarrak izaten jarraitzen du. Emakume eta gizonen arteko ezberdintasun sozialak handiak dira. Egoera hau, are eta nabariagoa da krisi garaiotan, non sexuaren araberako lan banaketaren on­do­rioz, enplegua eta lanaren arte­ko banaketa gero eta handiagoa den. Etxeko lanak eta zaintza lanak emakumeen ar­du­ra dira, errekonozimendu sozial eta ekonomikorik gabekoak.
Eredu patriarkalak  forma berriak hartuz eta egoera berrietara egokituz, berdintasunaren ideia faltsua barneratzera eraman gaitu; emakumeen zapalkuntza gaindituta dagoela pen­tsatzeraino. Baina oraindik ere, gizonen neurrira egindako munduan bizi gara; non emakumeak ez duen subjektu aktiboaren kon­tsiderazioa.
Hau guztiagatik beharrezkoa dugu gure egunerokotasuna definitzen duten egitura eta harreman guztiak zalantzan jartzea. Erabateko eredu-aldaketa behar dugu, eraldaketa feminista. Gure erronka nagusia jendarte eredu berri bat eraikitzea da, botere harremanetatik at, pribilejio eta zapalkuntzarik gabea; non pertsona guztiak (emakumeak, jatorri anitzekoak, langileak, gazteak…) parekoak izango garen; lehen mailako herritarrak izango garen.  
Hernani libre bat nahi dugu, pertsona libreen herri bat, zapalkuntzarik gabea.  Eta horretarako beharrezkoa da feminismoa erdigunean kokatzea.
Martxoaren 8an, igandea, 13:00etan MARIJIRA Plaza Berritik!