Urte asko igaro dira Eguberri bezperan abestera ateratzen hasi ginenetik. Ordubiak aldera gelditu, Irrintzin kafea hartu eta martxan jartzen ginen.
Pagoagatik hasi eta bailaran behera auzoa zeharkatzen genuen. Gure bozinak eta txistuak sumatu orduko ateak zabaltzen zenituzten gure abestiak entzuteko. Bizpahiru kanta abestu eta zuen borondatea jasota abiatzen ginen “Mila esker! Datorren urtera arte!!” esanaz.
Erabakia hartzea ez da erraza izan, baina gure pentsamenduetan bueltaka izan dugun ideiari heltzeko ordua iritsi da. Arrazoi batzuengatik edo besteengatik urteak pasa ahala zailagoa egin zaigu Gabonetako taldea osatzea.
Horregatik aurten ez dituzue gure bozinak, txistuak eta ahotsak entzungo. Gabonetako helduen taldea ez da aterako.
Lerro hauen bidez urte guzti hauetan zuen borondatea erakutsi diguzuen guztioi gure esker ona adierazi nahi dizuegu.
Diruz lagundu duzuenak, Olazar eta Ugaldetxon hartutako kafea eta gailetak, Txabolategiko ardoa eta gozoak, Julenen etxeko bajeran dastatutako surtidoak, Lastaolan Inaxio eta Anak eskaintzen zizkiguten edari eta polboroiak, Estarloa familiak prestatutako kalamarrak, Irubiden hartutako ardo eta pintxoak, Fagollagako kroketak, Larraingo sukaldeko berotasunean jandako txistorra eta patata tortilla eta erronda bukatzeko Goienetxeko txokoan eskaintzen ziguten azken piskolabisa.
GUZTIAGATIK, BIHOTZ-BIHOTZEZ, MILA ESKER!!!
Abesten genuen bezala “ondo banatu da behar zen lekura, auzotik falta ziren anaien etxera”
EGUBERRI ON!! Eta ikusi arte.